काठमाडौं । आइएमई ग्रुपले देशभर केबलकार निर्माणलाई तीव्रता दिएको छ । हाल देशका तीन स्थानमा केबलकार संचालनमा ल्याइसकेको आइएमई ग्रुपले सुदूरपश्चिम प्रदेशमा पनि केबलकार निर्माण सुरु गरेको हो ।
आइएमई समूहले सुदूरपश्चिमको कैलालीको चिसापानीमा केबलकार निर्माण सुरु गरेको हो । चिसापानीमा निर्माण हुने जालपादेवी केबलकारको शनिबार परराष्ट्रमन्त्री डा. आरजु राणा देउवाले शिलान्यास गरेकी हुन् ।
आइएमई ग्रुपले देशका सातवटै प्रदेशमा होटेल र केबलकारसहितको पर्यटकीय प्रडक्ट ‘हिल्स स्टेसन’ बनाउने योजना अनुरुप सुदूरपश्चिममा पनि केबलकार निर्माण अघि बढाएको हो ।
लम्कीचुहा नगरपालिका वडा नं. ३ को चिसापानीदेखि मोहन्याल गाउँपालिका वडा नं. ७ राजकाँडासम्म पुग्ने उक्त केबलकार ३.१ किलोमिटर लामो हुनेछ । उक्त केबलकारमा ३४ वटा गोन्डोला हुनेछन् ।
कुल ५ अर्ब रुपैयाँ लगानी हुने केबलकारको बटम स्टेसनमा केबलकार, होटल, क्यासिनो, ब्याक्वेट हल निर्माण हुनेछन् । त्यस्तै, टप स्टेसनमा रिसोर्ट, मन्दिर, स्काई वक, वकिङ ट्रेल, रेष्टुरेन्ट तथा चिल्ड्रेन पार्कसहित अन्य पर्यटकीय तथा मनोरञ्जनात्मक पूर्वाधारहरू निर्माण हुनेछन् ।
जालपादेवी केबलकार प्रालिका अध्यक्ष चन्द्रप्रसाद ढकालले पर्यटनले मात्र नेपालको आर्थिक, सांस्कृतिक र सामाजिक रूपमा मुलुकको कायापलट गर्न सम्भव रहेको बताए ।
उनले भने, ‘पर्यटन पूर्वाधारमा लगानी गरे मात्र लक्ष्यअनुसार पर्यटक भित्र्याई पर्यटकको बसाइ लम्ब्याएर थप विदेशी मुद्रा आर्जन गर्न सकिन्छ । थप रोजगारी सिर्जना गर्न सकिन्छ । थप राजस्व उठाउन सकिन्छ र हामीले अपेक्षा गरेको आर्थिक विकास र सम्मृद्धि हासिल गर्न सकिन्छ ।’
आइएमई ग्रुपले हाल देशका तीन प्रदेशमा केबलकार संचालनमा ल्याइसकेको छ । आइएमईले बागमती प्रदेशको काठमाडौंको चन्द्रागिरिमा २०७३ सालदेखि आफ्नो पहिलो केबलकार संचालनमा ल्याएको थियो ।
त्यस्तै, गत वर्षदेखि गण्डकी प्रदेशको नवलपुरमा मौलाकालिका केबलकार र लुम्बिनी प्रदेशको बुटवलमा लुम्बिनी केबलकार सञ्चालनमा ल्याइएको थियो ।
आइएमई समूहले कोशी प्रदेशमा पनि केबलकार निर्माण थालिसकेको छ । गत कात्तिक २३ गते पाथीभर केबलकारको शिलान्यास गरिएको थियो । ताप्लेजुङको काफ्लेपाटी डढेले छेउ मुख्य स्टेसन रहने उक्त केबलकार साढे २ किलोमिटर लामो हुनेछ । यसको निर्माण लागत ४ अर्ब बढी रहेको छ । केबलकारका लागि १३ वटा टावर निर्माण हुनेछ भने ४५ वटा गोन्डोला रहने छन् ।
त्यस्तै, आइएमईले गण्डकी प्रदेशकै कास्कीको सिकलेसमा ८ अर्ब लगानी गरेर लक्जरी रिसोर्टसहितको अर्को केबलकार निर्माण गर्ने योजना बनाएको छ । ६ किलोमिटरभन्दा लामो सिकलेस केबलकारमा बटमदेखि टपसम्म तीनवटा स्टेसन रहनेछन् ।
त्यस्तै, मधेस र कर्णाली प्रदेशमा पनि केबलकार निर्माणका लागि ठाउँ हेरिरहेको आइएमई ग्रुपले जनाएको छ ।
