काठमाडौं । निर्जीवन बीमा व्यवसायमा सुधार आएको छ । गत आर्थिक वर्षको मंसिरको तुलनामा चालु आवको सोही अवधिमा निर्जीवन बीमा कम्पनीको प्रिमियम संकलन ११.२४ प्रतिशतले बढेको हो ।
नेपाल बीमा प्राधिकरणको तथ्यांक अनुसार चालु आवको मंसिरसम्म १८ निर्जीवन बीमा कम्पनी (१४ निर्जीवन र ४ निर्जीवन लघु बीमा)ले १७ अर्ब ५१ करोड ६६ लाख रुपैयाँ बीमाशुल्क संकलन गरेका छन् । यो गत वर्षको सोही अवधिको तुलनामा १ अर्ब ७७ करोड रुपैयाँ धेरै हो । गत वर्ष मंसिरमा निर्जीवन बीमा कम्पनीले कुल १५ अर्ब ७४ करोड ८९ लाख रुपैयाँ बीमा शुल्क संकलन गरेका थिए ।
चालु आवको मंसिरसम्म १४ निर्जीवन बीमा कम्पनीले कुल १७ अर्ब १७ करोड ७७ लाख रुपैयाँ र ४ निर्जीवन लघुबीमा कम्पनीले ३३ करोड ८८ लाख रुपैयाँ प्रिमियम संकलन गरेका छन् । मंसिर महिनामा मात्रै निर्जीवन बीमा कम्पनीहरूले ३ अर्ब १६ करोड रुपैयाँ प्रिमियम संकलन गरेका छन् ।
चालु आवको मंसिरसम्म निर्जीवन बीमा कम्पनीहरूले कुल १२ लाख ७० हजार ६५७ वटा पोलिसी बिक्री गरेका छन् । यो गत वर्षको मंसिरकोभन्दा ९८ हजार २१० वटा धेरै हो । गत वर्ष मंसिरसम्म ११ लाख ७२ हजार ४४७ वटा पोलिसी बिक्री गरेका थिए ।
पछिल्लो समय अर्थतन्त्रमा क्रमशः सुधार देखिन थालेसँगै निर्जीवन बीमा व्यवसायमा पनि सुधार आएको हो । गत वर्ष माघसम्म घट्दो क्रममा रहेको निर्जीवन बीमा व्यवसायमा फागुनदेखि क्रमशः सुधार हुँदै आएको छ ।
मुख्यगरी निर्जीवन बीमा व्यवसायको एकतिहाई हिस्सा ओगट्ने सवारीसाधनको बिक्रीमा सुधार आउँदा समग्र बीमा व्यवसायमा सुधार आएको हो । त्यस्तै, सम्पत्ति बीमा गर्ने बढ्दा पनि व्यवसायमा सुधार देखिएको हो ।
यद्यपि, यस वर्ष बीमा कम्पनीहरूले व्यवसाय बढाए पनि दायित्व पनि ह्वात्तै बढेको लछ । गत असोज दोस्रो साता आएको बाढीपहिरोका कारण सवा १२ अर्ब ३६ करोड रुपैयाँ बढीको दाबी परेको छ । यो बीमा कम्पनीहरूको ३ महिनाको व्यवसाय बराबर हो ।
व्यवसायमा सगरमाथा अगाडि
निर्जीवन बीमा कम्पनी मध्ये व्यवसाय लिड गर्न मुख्य ३ कम्पनीहरू बीच मुख्य प्रतिस्पर्धा देखिएको छ । शिखर, सगरमाथा लुम्बिनी र सिद्धार्थ प्रिमियर बीच कडा टक्कर देखिएको हो ।
निर्जीवन बीमा व्यवसायमा आफ्नो वर्चश्व राख्दै आएको शिखरलाई यसपटक सगरमाथा लुम्बिनी (सलिको) इन्स्योरेन्सले उछिनेको छ । मंसिरसम्म सलिकोले सबैभन्दा धेरै २ अर्ब १९ करोड ९८ लाख रुपैयाँ बीमा शुल्क संकलन गरेको छ ।
त्यस्तै, सिद्धार्थ प्रिमियरले पनि व्यवसायमा शिखरलाई उछिनेको छ । १ अर्ब ७६ करोड ८५ लाख रुपैयाँ बीमा शुल्क उठाउँदै सिद्धार्थ प्रिमियर दोस्रो धेरै व्यवसाय गर्ने कम्पनी बनेको छ ।
विगतमा व्यवसायमा पहिलो स्थानमा रहँदै आएको शिखर मंसिरमा तेस्रो स्थानमा पुगेको छ । शिखरले १ अर्ब ७४ करोड २५ लाख रुपैयाँ बीमा शुल्क संकलन गरेको छ ।
मंसिरसम्म आइजीआइ प्रुडेन्सियल १ अर्ब ४५ करोड, हिमालयन एभरेष्ट इन्स्योरेन्सले १ अर्ब ४० करोड, नेको १ अर्ब ४० करोड, १ अर्ब १३ करोड, ओरेन्टल १ अर्ब १२ करोड, युनाटेड अजोड १ अर्ब २ करोड, एनएलजी १ अर्ब १३ करोड, सानिमा जीआइसी साढे ९९ करोड, प्रभु साढे ७६ करोड, राष्ट्रिय बीमा कम्पनी ६७ करोड र नेपाल इन्स्योरेन्सले साढे ९४ करोड रुपैयाँ बीमा शुलक संकलन गरेको छ ।
मंसिरसम्म नेशनलले सबैभन्दा कम ५४ करोड ३४ लाख रुपैयाँको व्यवसाय गरेको छ ।
व्यवसाय बढाउँदै लघुबीमा कम्पनी
लघुबीमा कम्पनीहरूले पनि आफ्नो व्यवसाय बढाउँदै लगेका छन् । गत असारसम्म कुल निर्जीवन बीमा व्यवसायमा लघुबीमा कम्पनीहरूको हिस्सा १ प्रतिशतभन्दा कम रहँदै आएकोमा चालु आवको मंसिर आइपुग्दा झण्डै २ प्रतिशत पुर्याएका छन् ।
४ निर्जीवन लघुबीमा कम्पनीले मंसिरसम्म २६ करोड १४ लाख रुपैयाँ बीमा शुल्क संकलन गरेका छन् । यो कुल निर्जीवन बीमा व्यवसायको १.९३ प्रतिशत हो ।
अघिल्लो वर्षदेखि संचालनमा आएका लघुबीमा कम्पनीहरूले क्रमशः आफ्नो व्यवसाय बढाउँदै लगेका हुन् । मंसिरसम्म नेपाल माइक्रो इन्स्योरेन्सले १० करोड १२ लाख, प्रोटेक्टिभ माइक्रो इन्स्योरेन्सले ८ करोड ३१ लाख, स्टार माइक्रो इन्स्योरेन्सले ७ करोड ७२ लाख र ट्रष्ट माइक्रो इन्स्योरेन्सले ७ करोड ७१ लाख रुपैयाँ बीमा शुल्क संकलन गरेका छन् ।
