काठमाडौं । मन्दाकिनी हाइड्रोपावर लिमिटेडले हाल कायम चुक्ता पूँजीको १२५ प्रतिशत हकप्रद सेयर जारी गर्ने भएको छ ।
कम्पनीले हकप्रद सेयर जारी गर्न ग्लोबल आइएमई क्यापिटल लिमिटेडलाई निष्कासन तथा बिक्री प्रबन्धक नियुक्त गरेको हो ।
सम्झौतापत्रमा कम्पनीका अध्यक्ष शरद कुमार दाहाल र ग्लोबल आइएमई क्यापिटलको तर्फबाट प्रमुख कार्यकारी अधिकृत मन्दिप लुर्इँटेलले हस्ताक्षर गरे ।
कम्पनीको गत मंसिर ७ गते सम्पन्न एघारौं वार्षिक साधारण सभाले हकप्रद प्रस्ताव पारित गरिसकेको छ ।
कम्पनीले हकप्रद सेयरबाट प्राप्त हुने रकम २.९ मेगावाटको माथिल्लो सार्दिखोला जलविद्युत आयोजना निर्माण र अन्य जलविद्युत परियोजनामा लगानी गर्ने बताएको छ ।
कम्पनीले हाल कास्कीको माछापुच्छ्रे गाउँपालिकामा ४ मेगावाटको सार्दीखोला जलविद्युत आयोजना संचालन गरिरहेको छ । उक्त आयोजनाबाट २०७४ मंसिरदेखि व्यावसायिक रुपमा विद्युत् उत्पादन हुँदै आइरहेको छ ।
