काठमाडौं । सेयर बजारमा दोहोरो अंकको गिरावट आएको छ । बुधबार ५ अंकले घटेको नेप्से आज ३१ अंकले घटेको हो ।
आज नेप्से परिसूचक ३१.४३ अंकले घटेर २५९६.८२ बिन्दुमा आइपुगेको छ । सूचकमा गिरावट आए पनि कारोबार रकम भने बढेको छ । अघिल्लो दिनको तुलनामा कारोबार रकम ४९ करोडले बढेर ४ अर्ब ७६ करोड रुपैयाँमा सीमित भएको छ ।
कारोबारमा आएका १३ वटै समूहको परिसूचक घटेको छ । व्यापार समूहको परिसूचक सर्वाधिक २.७३ प्रतिशतले घटेको छ ।
आज जानकी फाइनान्सको सर्वाधिक १७ करोड ६० लाख रुपैयाँको सेयर किनबेच भएको छ । त्यस्तै, कर्णाली डेभलपमेन्ट बैंकको ११ करोड ४५ लाख रुपैयाँको कारोबार भएको छ ।
आज कारोबारमा आएका मध्ये २९ कम्पनीको मात्र सेयर मूल्य बढेको छ भने २११ कम्पनीको मूल्य घटेको छ ।
घट्दो बजारमा पनि आज सपोर्ट माइक्रोफाइनान्सको सेयर मूल्यमा पोजेटिभ सर्किट लागेको छ । यसका सेयरधनीले ठ्याक्कै १० प्रतिश कमाएका छन् ।
आज नारायणी डेभलपमेन्ट बैंकका सेयरधनीले सर्वाधिक ९.२१ प्रतिशत गुमाएका छन् ।
