काठमाडौं । सेयर बजारमा उच्च अंकको वृद्धि भएको छ । गत बुधबारदेखि लगातार ओरालो लागेर ५ दिनमा १०५ अंकले घटेको नेप्से आज एकैदिन ४५ अंकले फर्केको हो ।
बुधबार नेप्से परिसूचक ४५.८८ अंकले बढेर २७१५.७१ बिन्दुमा पुगेको छ । यस दिन ३०८ कम्पनीको १ करोड १३ लाख ८६ हजार ८५४ कित्ता सेयर किनबेच भएको छ ।
सूचकमा सुधार आए पनि कारोबार रकम भने स्थिर रहेको छ । आज ५ अर्ब ५ करोड रुपैयाँको सेयर किनबेच भएको छ ।
कारोबारमा आएका १३ वटा समूहमध्ये म्युचुअल फण्ड बाहेक अरु सबै समूहको परिसूचक बढेको छ । बैंकिङ समूहको परिसूचक सर्वाधिक ३.४३ प्रतिशतले बढेको छ ।
आज जानकी फाइनान्सको सर्वाधिक ३६ करोड १५ लाख रुपैयाँको सेयर किनबेच भएको छ । त्यस्तै, रिभर फल्स पावरको २० करोड २४ लाख रुपैयाँको कारोबार भएको छ ।
आज कारोबारमा आएका मध्ये २१२ कम्पनीको सेयर मूल्य बढेको छ भने २८ कम्पनीको मात्र मूल्य घटेको छ ।
आज न्यादी हाइड्रोपावरका सेयरधनीले सर्वाधिक ९.९७ प्रतिशत कमाएका छन् ।
बढ्दो बजारमा खानीखोला हाइड्रोपावरका सेयरधनीले सर्वाधिक ९.९९ प्रतिशत गुमाएका छन् ।
