काठमाडौं । नेपाल टेलिकमलाई उछिन्दै विशाल बजार कम्पनी पूँजीकरणका आधारमा नेपाली सेयर बजारको सबैभन्दा ठूलो कम्पनी बनेको छ ।
विशाल बजारको सेयर संरचना परिवर्तन भई एकैपटक ठूलो संख्यामा सेयर थपिएपछि टेलिकमलाई उछिन्दै सबैभन्दा ठूलो कम्पनी बनेको हो ।
नेप्सेका अनुसार बुधबार विशाल बजारको बजार पूँजीकरण १ खर्ब ९८ अर्ब ४५ करोड रुपैयाँ पुगेको छ । यो दोस्रो स्थानमा रहेको टेलिकमकोभन्दा २१ अर्ब धेरै हो । टेलिकमको बजार पूँजीकरण १ खर्ब ७७ अर्ब ८५ करोड रुपैयाँ छ ।
चुक्ता पूँजीका आधारमा टेलिकम विशाल बजारभन्दा ४ गुणा ठूलो भए पनि मूल्य उच्च हुँदा पछि पारेको हो । टेलिकमको चुक्ता पूँजी १८ अर्ब रुपैयाँ छ भने मूल्य प्रतिकित्ता ९८८ रुपैयाँ मात्रै छ । विशाल बजारको चुक्ता पूँजी ४ अर्ब १ करोड भए पनि मूल्य प्रतिकित्ता ४९५० रुपैयाँ छ ।
मंगलबारसम्म विशाल बजारको कुल बजार पूँजीकरण २ अर्ब २१ करोड रुपैयाँ मात्रै थियो । तर, बुधबार एकैदिनमा ९० गुणाले बढ्दै २ खर्ब नजिक पुगको हो ।
यसरी एकाएक विशाल बजारको पूँजीकरण बढ्नुको कारण हो चुक्ता पूँजी वृद्धि । मंगलबार मात्रै कम्पनीको सरकारको नाममा रहेको ३ करोड ९६ लाख ८ हजार ६०० कित्ता सेयर सूचीकृत भएको थियो । त्यसअघि जम्मा ५ करोड चुक्ता पूँजी रहेको विशाल बजारको अहिले ४ अर्ब १ करोड रुपैयाँ पुगेको छ ।
त्यस्तै, पछिल्ला दुई कारोबार दिनमै विशाल बजारको सेयर मूल्य प्रतिकित्ता ७७४ रुपैयाँले बढेर ४९५० रुपैयाँ पुगेको छ । कम्पनीको सेयर संख्या र मूल्य बढेपछि पूँजीकरण ह्वात्तै बढेको हो ।
विशाल बजार कम्पनी स्थापना हुने समयमा सरकारले दिएको ४ जग्गाको हिसाब भएको थिएन । उक्त जग्गा बारे विवाद भई अदालतमा मुद्दा परेको थियो । सर्वोच्च अदालत र पाटन अदालतले उक्त जग्गाको मूल्यांकन गरी सेयरमा परिवर्तन गर्न आदेश दिएका थिए । सोही अनुसार जग्गाको मूल्यांकन गरी सरकारको नाममा ३ अर्ब ९६ करोडको सेयर सूचीकृत भएको हो ।
नयाँ पूँजी संरचना अनुसार विशाल बजारमा सरकारको सेयर हिस्सा झण्डै ९९ प्रतिशत पुगेको छ । १.०४ प्रतिशत हिस्सा मात्रै सर्वसाधरणको सेयर हिस्सा छ ।
