काठमाडौं । कोशी प्रदेशको प्रसिद्ध धार्मिकस्थल ताप्लेजुङको पाथीभरामा केबलकार निर्माणको विषयलाई लिएर झडप भएको छ ।
शुक्रबार दिउँसो ताप्लेजुङको फुङ्लिङ नगरपालिका-१० काफ्लेपाटीमा केबलकार निर्माणको शिलान्यास गर्ने क्रममा दुई पक्ष बीच झडप भएको हो ।
पाथीभरा दर्शन केबलकार प्रालिले आज तल्लोफेदीस्थित काफ्ले पाटीमा केबलकारको स्टेशनको शिलान्याश गर्ने कार्यक्रम राखेको थियो । केबलकारको शिलान्यका लागि जिल्लामा जनप्रतिनिधहरू समेत पुगेका थिए ।
तर, कार्यक्रम सुरु हुने बित्तिकै पाथीभरामा केबलकार बनाउन दिनु हुँदैन भन्ने व्यक्तिहरूको समूहले विथोल्न खोजेपछि दुई पक्ष बीच झडप भएको हो । विपक्षी टोलीले अन्धाधुन्ध ढुंगामुडा गर्दा केही व्यक्तिहरू घाइते भएको जिल्ला प्रहरी कार्यालय, ताप्लेजुङले जनाएको छ । प्रहरीले केही व्यक्तिलाई नियन्त्रमा समेत लिएको छ ।
पाथीभरमा केबलकार निर्माणको बारे लामो समयदेखि विवाद रहँदै आएको छ । पाथीभरा लिम्वूहरूको मुन्धुमीस्थल भएकाले केबलकार निर्माण गर्न नहुने भन्दै विरोध गर्दै आएका छन् । साथै, पाथीभराको प्राकृतिक स्वरुप पनि बिग्रने उनीहरूको भनाइ छ ।
पाथीभरा मन्दिर आसपास कुनै संरचना नरहने र अहिलेको पदमार्ग हुँदै पाथीभरा मन्दिर प्रवेशद्वारबाटै तीर्थालु तथा दर्शनार्थी जान सकिने गरी केबलकार निर्माण गर्न लागिएको हो ।
पाथीभरा केबलकार नेपाल उद्योग वाणिज्य महासंधका अध्यक्ष चन्द्रप्रसाद ढकाल समूहको लगानीमा निर्माण हुन लागेको हो । काफ्लेपाटी डढेले छेउ मुख्य स्टेसन रहने केबलकारको डिजाइन अनुसार त्यहाँबाट करिब २ हजार ७९४ मिटर उचाइमा रहेको पाथीभरा क्षेत्रसम्म पुग्न सकिनेछ ।
मुख्य स्टेसनबाट १० मिनेटमा केबलकारको अन्तिम स्टेसन पुग्न सकिने कम्पनीले जनाएको छ । केबलकारका लागि १३ वटा टावर निर्माण हुनेछ । सो केबलकारमा ४५ वटा गोन्डुला रहने कम्पनीले कम्पनीले जनाएको छ ।
काफ्लेपाटीदेखि पाथीभरा मन्दिरसम्म केबलकार निर्माणका लागि सरकारले अनुमति दिएको छ । पाथीभरा मन्दिर ३ हजार ७९४ मिटर उचाइमा रहेको छ । केबलकार निर्माण गर्न ४ अर्ब रुपैयाँभन्दा बढी लाग्ने कम्पनीले जनाएको छ ।
