काठमाडौं । पोखरा अन्तर्राष्ट्रिय विमानस्थल संचालनमा आएको २२ महिनामा तेस्रो अन्तर्राष्ट्रिय उडान भएको छ । बिहीबार पोखरा विमानस्थलमा चीनको सिचुवान एयरलाइन्सले उडान गरेको हो ।
चीनको कुनमिङबाट १३४ जना यात्रु लिएर आएको सिचुवान एयरलाइन्सको एयर बस ३१९ चार्टर्ड विमान पोखरामा विमानस्थलमा बिहीबार दिउँसो २ः४० मा अवतरण गरेको थियो ।
उक्त विमानमा पोखरामा हुन लागेको तेस्रो पोखरा अन्तर्राष्ट्रिय पर्वतीय क्रसकन्ट्री दौड प्रतियोगितामा सहभागी हुने चिनियाँ खेलाडी, दर्शक र अन्य प्रतिनिधिहरू आएका हुन् ।
१४ महिनापछि बिहीबार पोखरा विमानस्थलमा अन्तर्राष्ट्रिय उडान भएको हो । यसअघि पहिलोपटक २०८० असार ६ गते पोखरा अन्तर्राष्ट्रिय विमानस्थलमा सिचुवान एयरलाइन्सले नै पहिलो अन्तर्राष्ट्रिय उडान गरेको थियो । सो बेला सिचुवानले छेन्दु–तियान्फु विमानस्थलबाट उडान गरेको थियो ।
त्यस्तै, २०८० भदौ २३ गते भुटानको पारोबाट ड्रुक एयरको एयरबस ए ३१९ जहाजले चार्टर्ड उडान गरेको थियो । त्यसयता कुनै विदेशी एयरलाइन्सले उडान गरेका थिएनन् ।
२०७९ पुस १७ गतेदेखि संचालनमा ल्याइएको पोखरा अन्तर्राष्ट्रिय विमानस्थलमा अझै नियमित अन्तर्राष्ट्रिय उडान हुन सकेको छैन । सरकारले उक्त विमानस्थल संचालनमा ल्याउन ग्राउण्ड ह्याण्डलिङ, हवाइ इन्धन लगायतमा छुट दिए पनि त्यहाँबाट उडान गर्न विदेशी एयरलाइन्स कम्पनीहरु आकर्षित हुन सकेका छैनन् ।
पोखरा विमानस्थल चीनको एक्जिम बैंकबाट २१ करोड ६० लाख रुपैयाँ डलर ऋण लिएर बनाइएको हो ।
