काठमाडौं । सिंगापुरको आदित्य बिरला ग्लोबल ट्रेडिङ प्रालिले २५ हजार टन डीएपी रासायनिक मल ल्याउने ठेक्का पाएको छ । कृषि सामग्री कम्पनी लिमिटेडले ग्लोबल टेन्डरबाट मल खरिदको ठेक्का आदित्य बिरलालाई दिएको हो ।
कृषि सामग्री कम्पनीका अनुसार उक्त कम्पनीले १ करोड ८९ लाख ७५ हजार अमेरिकी डलर (करिब २ अर्ब ५६ करोड रुपैयाँ)मा डीएपी मल खरिदको ठेक्का पाएको हो ।
कृषि सामग्री कम्पनीले प्रतिटन ७ सय ५९ डलरमा नेपालले मल किन्ने गरी ठेक्का दिएको हो। आदित्य बिरलाले वीरगञ्ज, विराटनगर र भैरहवामा मलको आपूर्ति दिनेछ । ठेक्का सम्झौता अनुसार कम्पनीले साढे २ महिना (१०७ दिन) भित्र मल ल्याइसक्नुपर्नेछ ।
सरकारले चालु आवमा ५ लाख ५० हजार टन रासायनिक मल खरिद गर्ने लक्ष्य राखेको छ । सो अनुसार धमाधम ठेक्का लगाइरहेको हो ।
कृषि तथा पशुपंक्षी मन्त्रालयका अनुसार चालु आव २०८१/८२ (असोज मसान्तसम्म) १ लाख ५५ हजार ६८९ टन मल आयात भइसकेको छ । गत वर्षको मौज्दातसहित हाल १ लाख ४४ हजार ८२५ टन मल भण्डारमा रहेको मन्त्रालयले जनाएको छ ।
