काठमाडौं । समता घरेलु लघुवित्त वित्तीय संस्थाको थप सार्वजनिक निष्काशन (एफपीआ)मा मागभन्दा ६०.७२ गुणा धेरै आवेदन परेको छ ।
सीडीएस एण्ड क्लियरिङका अनुसार लघुवित्तको एफपीओमा कुल २ करोड १३ लाख ८ हजार ५७० कित्ताका लागि १४ लाख ३२ हजार ४२० जनाले आवेदन दिएका छन् । यद्यपि, अन्तिम तथ्यांक नआइसकेकाले आवेदकको संख्या अझै बढ्न सक्ने सीडीएसले जनाएको छ ।
लघुवित्तको एफपीओ भर्ने मध्ये ९७.५५ प्रतिशत आवेदकले नपाउने भएका छन् । लघुवित्तले जम्मा ३ लाख ५० हजार ९०४ कित्ता एफपीओ बिक्रीमा ल्याएको छ ।
धितोपत्र बाँडफाँट नियमावली अनुसार आवेदकलाई कम्तीमा १० कित्ताका दरले सेयर दिनुपर्ने व्यवस्था छ । सो अनुसार ३५ हजार ९० जना अथार्त २.४५ प्रतिशत आवेदकलाई मात्र १० कित्ताका दरले सेयर बाँडफाँट गर्न पुग्छ । बाँकी १३ लाख ९७ हजार बढीको हात रित्तो हुने देखिएको छ ।
हाल ५६ करोड ४० लाख ६ हजार ३०४ रुपैयाँ चुक्ता पूँजी रहेको लघुवित्तको एफपीओ जारीपछि ५९ करोड ९० लाख ९६ हजार ७२८ रुपैयाँ पुग्नेछ।
