काठमाडौं । सीईडीबी हाइड्रोपावर डेभलपमेन्ट कम्पनीको खुद नाफामा उछाल आएको छ । कम्पनीले मंगलबार सार्वजनिक गरेको चालु आर्थिक वर्ष २०८१/८२ को पहिलो त्रैमासको अपरिष्कृत वित्तीय विवरण अनुसार खुद नाफा २०२.२८ प्रतिशतले बढेकोे छ ।
कम्पनीले चालु आवको असोज मसान्तसम्म ९ करोड ७ लाख रुपैयाँ खुद नाफा कमाएको छ । यो गत वर्षको सोही अवधिको तुलनामा ६ करोड ७ लाख रुपैयाँ धेरै हो । सीईडीबीले गत वर्षको पहिलो त्रैमासमा ३ करोड रुपैयाँ खुद नाफा कमाएको थियो ।
समीक्षा अवधिमा कम्पनीको सर्भिस चार्ज, ब्याज तथा अन्य आम्दानीमा उल्लेख्य वृद्धि हुँदा खुदा नाफामा उछाल आएको हो । यस अवधिमा कम्पनीको यस्तो आम्दानी १४५.९२ प्रतिशतले बढेर १० करोड ७ लाख रुपैयाँ पुगेको छ । गत वर्षको सोही अवधिको कम्पनीको यस्तो आम्दानी ४ करोड ९ लाख रुपैयाँ मात्रै थियो ।
सामीक्षा अवधिमा कम्पनीको कुल खर्च पनि ४१.३९ प्रतिशतले बढेर ८९ लाख रुपैयाँ पुगेको छ ।
हाल १ अर्ब ३ करोड ४२ लाख रुपैयाँ चुक्ता पूँजी रहेको कम्पनीको जगेडा कोषमा ४८ करोड ६० लाख रुपैयाँ संचित छ ।
खुद नाफा बढेसँगै पनि कम्पनीको प्रतिसेयर आम्दानी पनि दोब्बरभन्दा धेरैले बढेको छ । गत असोजमा १४.३१ रुपैयाँ रहेको कम्पनीको प्रतिसेयर आम्दानी यस वर्ष बढेर ३५.११ रुपैयाँ पुगेको छ
समीक्षा अवधिमा कम्पनीको प्रतिसेयर नेटवर्थ १४७ रुपैयाँ र मूल्य आम्दानी अनुपात ५०.९८ गुणा छ ।
