काठमाडौं । बीपी राजमार्ग अन्तर्गत सिन्धुलीको सुनकोशी गाउँपालिका–७ कानढुंग्री नजिक सडक भासिएको छ ।
खुर्कोट-नेपालथोक सडकखण्डको सुनकोशी-मरिण डाइभर्सनको सुरुङमार्ग नजिकै आइतबार बिहान करिब ५० मिटर सडक भासिएको हो ।
सुनकोशी नदीले कटान गरेपछि सडक भासिएको जिल्ला प्रहरी कार्यालय सिन्धुलीले जनाएको छ । कालोपत्र सडक पूरै भासिएपछि सवारी साधन वारपार हुनसक्ने अवस्था रहेको छैन ।
शनिबारदेखि नै बीपी राजमार्ग पूर्ण रुपमा बन्द छ । नेपालथोक नजिक रोशी खोलाले करिब ६० मिटर सडक पूरै बगाएको छ । त्यहाँ अस्थायी सडक निर्माण गरेर यातायात संचालन गर्ने तयारी भइरहेको प्रहरीले जनाएको छ ।
त्यस्तै, नेपालथोक-खुर्कोट खण्डको कमेरेफाँटमा खसेको लेदोसहितको खसेको पहिरो हटाउने काम जारी छ ।
