काठमाडौं । सेयर बजारमा तीव्र उतरचढाव आएको छ । अघिल्ला दुई दिनमै १९२ अंकले घटेको नेप्से इन्ट्रा डेमा ७८ अंकले सम्म बढेको थियो । तर, अन्त्यमा ३ अंकले मात्रै बढेर बन्द भयो । दिनभरमा नेप्सेमा ९८ अंकको उतरचढाव आएको थियो ।
सूचकमा झिनो वृद्धि भए पनि आज कारोबार रकममा भारी गिरावट आएको छ । अघिल्लो दिनको तुलनामा कारोबार रकम ४ अर्ब ९२ करोड रुपैयाँले घटेर १३ अर्ब ७२ करोड रुपैयाँमा सीमित भएको छ । यो आधा महिना यताकै कम कारोबार हो ।
बुधबार नेप्से परिसूचक ३.८० अंकले बढेर २७८६.४० बिन्दुमा आइपुगेको छ । आज ३२६ कम्पनीको ३ करोड ५० लाख ७ हजार ३९ कित्ता सेयर किनबेच भएको छ ।
कारोबारमा आएका १३ समूहमध्ये ७ समूहको परिसूचक बढेको छ भने ६ को घटेको छ । आज लगानी समूहको परिसूचक सबैभन्दा धेरै १.०१ प्रतिशतले बढेको छ भने फाइनान्स १.६९ प्रतिशतले घटेको छ ।
आज चन्द्रागिरि हिल्सको ४३ करोड ७ लाख रुपैयाँ बढीको सेयर किनबेच भएको हो । त्यस्तै, नेपाल फाइनान्सको ४१ करोड ५८ लाख रुपैयाँको सेयर कारोबार भएको छ ।
आज कारोबारमा आएका कम्पनीमध्ये ९८ कम्पनीको मूल्य बढेको छ भने १४२ कम्पनीको घटेको छ ।
झिनो अंकले बढेको बजारमा पनि आज ४ कम्पनीको सेयर मूल्यमा पोजेटिभ सर्किट लागेको छ । लिबर्टी इनर्जी, हिमालयन हाइड्रोपावर, मिड सोलु हाइड्रोपावर र आत्मनिभएर लघुवित्तको सेयर मूल्य १० प्रतिशतले बढेको छ ।
आज कर्णाली डेभलपमेन्ट बैंकका सेयरधनीले सर्वाधिक ६.८८ प्रतिशत गुमाएका छन् ।
