काठमाडौं । अर्थमन्त्री विष्णुप्रसाद पौडेलले सरकारले निजी क्षेत्रलाई दुःख दिने कुनै किसिमको काम नगर्ने बताएक छन् ।
मंगलबार नाडा अटो शो २०२४ को उद्घाटन गर्दै उनले सरकारले निजी क्षेत्रलाई दुःख दिनेलाई पनि नियन्त्रण गर्ने बताएका हुन् ।
‘व्यवसायीहरु सरकारले दुःख दियो भन्नुहुन्छ । सरकारले निजी क्षेत्रलाई दुःख दिने किसिमको कुनै काम गर्दैन । कसैले दुःख दियो भने सरकारले त्यसलाई नियन्त्रण गर्छ,’ अर्थमन्त्री पौडेलले भने ।
उनले असल काम गर्ने व्यवसायीलाई सरकारले सधैं साथ दिने बताए । ‘नीतिगत स्थिरता सुनिश्चित गर्न सरकार तयार छ। निजी क्षेत्रलाई हरेक हिसाबमा सरकारले सहयोग गरेर अगाडि बढ्छ,’ उनले भने ।
अर्थमन्त्री पौडेलले नीति सुधारका लागि सरकारले काम गर्ने उल्लेख गरे ।उनले अटो क्षेत्रमा मात्रै नभएर अर्थतन्त्रका सबै क्षेत्रमा परिमार्जन गर्दै जाने सरकारको सोच रहेको बताए ।
