काठमाडौं । सर्वोच्च अदालतले ३० वर्षे सेवा अवधि पुगेका प्रहरी अधिकारीहरूलाई तत्काल अवकाश नदिन अन्तरिम आदेश दिएको छ ।
बिहीबार सर्वोच्चका न्यायाधीश हरिप्रसाद फुयालको एकल इजलासले ३० वर्षे सेवा अवधिका कारण अवकाश हुन लागेका प्रहरीहरूलाई अवकाश नदिन अन्तरिम आदेश दिएको हो ।
३० वर्षे सेवा अवधिका कारण १६ भदौदेखि अवाकाश हुन लागेका २१ प्रहरी अधिकारीले सेवा अवधि हटाउनुपर्ने माग गर्दै प्रधानमन्त्री तथा मन्त्रिपरिषद कार्यालय, गृह मन्त्रालय, प्रहरी प्रधान कार्यालय र प्रहरी किताबखानालाई विपक्षी बनाएर सर्वोच्च अदालतमा रिट दायर गरेका थिए ।
सर्वोच्चले यसअघि बृहत पूर्ण इजलासले दिएको निर्देशनात्मक आदेश पालना भएको नदेखिएको भन्दै उनीहरूको हकमा जिम्मेवारी परिवर्तन नगराउन पनि अन्तरिम आदेश दिएको छ ।
सर्वोच्चले यो विवादमा विपक्षीसँग लिखित जवाफ माग गरेको छ । असोज १० गते पूर्ण सुनुवाइ गर्ने जनाएको छ ।
