काठमाडौं । सेयर बजारमा तीव्र उतरचढाव आएको छ । बजार खुल्ने बित्तिकै १५ अंकले बढेको नेप्से दिउँसो ३५ अंकले घटेको थियो भने अन्त्यमा २ अंकले बढेर बन्द भएको हो ।
इन्ट्राडेमा नेप्से परिसूचक २५०४ बिन्दुसम्म पुगेको थियो । प्रफिट बुक गर्ने र खरिदकर्ता बीच तीव्र मोलमोलाइ हुँदा नेप्सेमा ६२ अंकको उतरचढाव आएको थियो ।
सोमबार नेप्से परिसूचक २.१५ अंकले बढेर २४८८.०९ बिन्दुमा पुगेको छ । ३०९ कम्पनीको ३ करोड ९७ लाख ५४ हजार ७११ कित्ता सेयर किनबेच भएको छ ।
सूचकमा झिनो वृद्धि भए पनि आज कारोबार रकममा भने गिरावट आएको छ । अघिल्लो दिनको तुलनामा कारोबार रकम १ अर्ब ३० करोड रुपैयाँले घटेर १३ अर्ब ९१ करोडमा सीमित भएको छ ।
कारोबारमा आएका १३ वटा समूहमध्ये ७ समूहको परिसूचक बढेको छ भने ५ को घटेको छ । उत्पादनमूलक समूहको परिसूचक सर्वाधिक २.१६ प्रतिशतले बढेको छ भने बैंकिङ १.२३ प्रतिशतले घटेको छ ।
आज हिमालयन रि इन्स्योरेन्सकोे सर्वाधिक कारोबार भएको छ । यसको ३६ करोड ३९ लाख रुपैयाँ बढीको ५ लाख ६५ हजार ६४३ कित्ता सेयर किनबेच भएको छ । त्यस्तै, शिवम् सिमेन्टको ३४ करोड ७८ लाख रुपैयाँ बढीको सेयर कारोबार भएको छ ।
कारोबारमा आएका ११५ कम्पनीको सेयर मूल्य बढेको छ भने १२१ कम्पनीको मूल्य घटेको छ ।
झिनो अंकले बढेको बजारमा मुक्तिनाथ कृषि कम्पनीको सेयर मूल्यमा पोजेटिभ सर्किट लागेको छ । यसका सेयरधनीले ठ्याक्कै १० प्रतिशत कमाएका छन् ।
त्यसैगरी, नेपाल फाइनान्स ८.६७ प्रतिशत, छ्याङ्दी हाइड्रोपावर ७.९० प्रतिशत, बलेफी हाइड्रोपावर, रिडी पावर, समताघरेलु लघुवित्त लगायत आधादर्जन कम्पनीकाे सेयर मूल्य ६ प्रतिशतले बढेको छ ।
आज गणपति लघुवित्तका सेयरधनीले भने सर्वाधिक ९.९४ प्रतिशत गुमाएका छन् ।
