काठमाडौं । सेयर बजारमा लगातार दोस्रो दिन गिरावट आएको छ । बुधबार साढे ५ अंकले घटेको नेप्से आज झण्डै २ अंकले घटेको छ ।
बिहीबार नेप्से परिसूचक १.९३ अंकले घटेर २०७७.७९ बिन्दुमा आइपुगेको छ । सूचकमा गिरावट आए पनि कारोबार रकममा भने सुधार आएको छ । अघिल्लो दिनको तुलनामा करोबार रकम ३९ करोड बढेर आज ४ अर्ब ३८ करोड रुपैयाँ पुगेको छ ।
बिहीबार ३२२ कम्पनीको ८८ लाख १३ हजार ३७४ कित्ता सेयर किनबेच भएको छ ।
कारोबारमा आएका १३ वटा उपसमूहमध्ये ५ को परिसूचक बढेको छ भने ८ को घटेको छ । आज व्यापार उपसमूहको परिसूचक सर्वाधिक १.९६ प्रतिशतले बढेको छ भने फाइनान्स उपसमूहको परिसूचक २.०८ प्रतिशतले घटेको छ ।
आज एनआरएन इन्फ्रास्ट्रक्चर कम्पनीको सर्वाधिक कारोबार भएको छ । यसको १८ करोड ६८ लाख रुपैयाँको ३ लाख ६ हजार ३०० कित्ता सेयर किनबेच भएको छ ।
कारोबारमा आएका मध्ये १०१ कम्पनीको सेयर मूल्य बढेको छ भने १३५ कम्पनीको घटेको छ ।
घट्दो बजारमा पनि आज तीन कम्पनीको सेयर मूल्यमा पोजेटिभ सर्किट लागेको छ । इमर्जिङ नेपाल, भगवती हाइड्रोपावर र मिड सोलु हाइड्रोपावरको सेयर मूल्य ठ्याक्कै १० प्रतिशत बढेको छ ।
आज माइ खोला हाइड्रोपावरका सेयरधनीले भने सर्वाधिक ६.४० प्रतिशत गुमाएका छन् ।
