काठमाडौं । आज (जेठ १ गते)देखि सेयर कारोबार गर्दा तिर्नुपर्ने पर्ने ब्रोकर कमिसन शुल्क घटेको छ । नेपाल धितोपत्र बोर्डको गत हप्ताकाे निर्णय अनुसार आजदेखि नयाँ ब्रोकर कमिसन लागू भएको हो ।
धितोपत्र बोर्डले गत साता साविकको ब्रोकर कमिसन दरमा १० प्रतिशत घटाउने निर्णय गरेको थियो । सोही दरमा कमिसन घटाउन अर्थ मन्त्रालयले समेत स्वीकृति दिएको थियो ।
आजदेखि सेयर काराेबार गर्दा न्यूनतम ०.२४ प्रतिशतदेखि अधिकतम ०.३६ प्रतिशतसम्म ब्रोकर कमिसन तिर्नुपर्छ । यसअघि न्यूनतम ०.२७ प्रतिशतदेखि अधिकतम ०.४० प्रतिशतसम्म कमिसन तिर्नुपर्थ्यो ।
नयाँ ब्रोकर कमिसनदर अनुसार आजदेखि ५० हजारसम्मको कारोबारमा ०.३६ प्रतिशत, ५० हजारदेखि ५ लाखसम्मको कारोबारमा ०.३३ प्रतिशत, ५ लाखदेखि २० लाखसम्मको कारोबारमा ०.३०६ प्रतिशत, २० लाखदेखि १ करोडसम्म ०.२७ प्रतिशत र १ करोड रुपैयाँ बढीको सेयर किनबेच गर्दा ०.२४३ प्रतिशत कमिसन तिर्नुपर्छ ।
यसअघि ५० हजार रुपैयाँसम्मको सेयर खरिदबिक्री गर्दा ०.४० प्रतिशत, ५० हजारदेखि ५ लाखसम्मको कारोबारमा ०.३७ प्रतिशत, ५ लाखदेखि २० लाखसम्मको कारोबारमा ०.३४ प्रतिशत, २० लाखदेखि १ करोडसम्मको कारोबारमा ०.३० प्रतिशत र १ करोड रुपैयाँभन्दा माथिको कारोबारमा ०.२७ प्रतिशत ब्रोकर कमिसन तिर्नुपर्थ्यो ।
