काठमाडौं । १६९८ मेगावाट बराबरका दुई जलविद्युत् आयोजना अघि बढाउने सहमति भएको छ । बिहीबार अर्थ मन्त्रालयमा सरकार, विश्व बैंक र एसियाली विकास बैंक बीच भएको छलफलमा माथिल्ले अरुण र दूधकोशी जलासययुक्त आयोजना अघि बढाउने सहमति भएको हो ।
अर्थमन्त्री वर्षमान पुन, ऊर्जामन्त्री शक्तिबहादुर बस्नेत, विश्व बैंकका नेपाल, माल्दिभ्स र श्रीलंका हेर्ने निर्देशक फारिस हजाद जर्भोस तथा एसियाली विकास बैंकका नेपाल निर्देशक अर्नाउड काउचियोस बीच दुवै आयोजनाको वित्तीय व्यवस्थापन छिटो सकेर निर्माणको काम अघि बढाउने सहमति भएको हो ।
संखुवासभाको भोटखोला गाउँपालिकामा निर्माण हुने १ हजार ६३ मेगावाटको अर्धजलासययुक्त माथिल्लो अरुणकोे वित्तीय व्यवस्थापन विश्व बैंकले गर्नेछ ।
त्यसैगरी, खोटाङ, ओखलढुङ्गा, सोलुखुम्बुको सिमानामा पर्ने दूधकोशी नदीमा निर्माण हुने ६३५ मेगावाटको जलासययुक्त दूधकोशी जलविद्युत आयोजनामा एसियाली विकास बैंक नेतृत्वको सहवित्तीयकरणमा अन्तर्राष्ट्रिय वित्तीय संस्थाको सहुलियतपूर्ण ऋण र स्वदेशी बैंक तथा वित्तीय संस्था लगानी रहने छ ।
दुवै आयोजनामा ७० प्रतिशत ऋण लगानी र ३० प्रतिशत स्वपूँजी (इक्विटी) बाट वित्तीय व्यवस्थापन गर्ने तयारी छ । आयोजना प्रवद्र्धक नेपाल विद्युत प्राधिकरणको सहायक कम्पनी माथिल्लो अरुण हाइड्रो–इलेक्ट्रिक लिमिटेडले आगामी सन् २०२६ को सुरुबाटै आयोजना निर्माण थालिने बताएको छ ।
यस्तै, ६३५ मेगावाटको दूधकोशी जलविद्युत आयोेजनाको सम्भाव्यता अध्ययन, विस्तृत इञ्जिनियरिङ डिजाइन, वातवारणीय प्रभाव अध्ययन मूल्याङ्कनलायतका काम सकिएका छन् भने पहुँच मार्ग निर्माण र मुआब्जा वितरणको काम अन्तिम चरणमा छ ।
