काठमाडौं । सेयर बजारमा लगातार पाँचौं दिन गिरावट आएको छ । यस साता आइतबारदेखि लगातार ओरालो लागेको नेप्सेले आज पनि सोही लय कायम राखेको हो । ५ दिनमा नेप्से ३२ अंकले घटेको छ ।
सूचकमा गिरावट आए पनि आज कारोबार रकम भने बढेको छ । अघिल्लो दिनको तुलनामा कारोबार रकम ४७ करोडले बढेर ३ अर्ब ३ करोड रुपैयाँ पुगेको छ ।
बिहीबार नेप्से परिसूचक २.७३ अंकले घटेर २००४.०५ बिन्दुमा आइपुगेको छ । यसदिन ३०२ कम्पनीको ६९ लाख ६३ हजार ३५९ कित्ता सेयर किनबेच भएको छ ।
आज कारोबारमा आएका १३ वटा उपसमूह मध्ये ५ समूहको परिसूचक बढेको छ भने ८ को घटेको छ । लघुवित्त समूहको परिसूचक सर्वाधिक २.३८ प्रतिशतले बढेको छ भने उत्पादनमूलक समूह १.६१ प्रतिशतले घटेको छ ।
आज गोर्खा फाइनान्सको सर्वाधिक कारोबार भएको छ । यसको २३ करोड ३२ लाख रुपैयाँ बराबरको २ लाख ७० हजार ६९८ कित्ता सेयर किनबेच भएको छ ।
घट्दो बजारमा आज तीन लघुवित्तको सेयर मूल्यमा पोजेटिभ सर्किट लागेको छ । मानुषी लघुवित्त, मनकामना स्मार्ट लघुवित्त र गुराँस लघुवित्तका सेयरधनीले १० प्रतिशत कमाएका छन् ।
पिपुल्स पावरका सेयरधनीले भने सर्वाधिक ७.२४ प्रतिशत गुमाएका छन् ।
