काठमाडौं । यही चैत महिनाभित्रै नेपाल स्टक एक्सचेन्ज (नेप्से)मा सूचीकृत ३ कम्पनीको लकइन पिरियड सकिने भएको छ । चैतभित्रै सूर्यज्योति लाइफ इन्स्योरेन्स, सोनापुर मिनरल्स एण्ड आयल र सिंगटी हाइड्रोपावरको सेयरको लकइन सकिने भएको हो ।
ती कम्पनीहरूले आयोजना प्रभावित क्षेत्रका स्थानीय, संस्थापक, कर्मचारी र सामूहिक लगानी कोषलाई जारी गरेको सेयरको लकइन अवधि सकिने भएको हो ।
नेपाल धितोपत्र बोर्डले सूचीकृत कम्पनीको सेयरको लकइन सकिनु १ महिना अगावै सूचना जारी गरी जानकारी लगराउनुपर्ने व्यवस्था गरेको छ । सोही अनुसार कम्पनीहरूले लकइन पिरियड सकिने दिन सार्वजनिक गरेका छन् । लकइन सकिएको मितिदेखि कम्पनी दोस्रो बजारमा कारोबार गर्न योग्य हुन्छ ।
सूर्याज्योति लाइफ इन्स्योरेन्सले आफ्ना कर्मचारीलाई जारी गरेको २ लाख ९९ हजार २९३ कित्ता सेयरको लकइन चैत २० देखि सकिने भएको छ । त्यस्तै, संस्थापक समूहबाट सर्वसाधारण समूहमा परिणत भएको ३७ लाख ९१ हजार ९१ कित्ता र संस्थापक समूह्को १ करोड ७५ लाख ९७९ कित्ता सेयरको लकइन सकिने कम्पनीले जानकारी गराएको छ ।
त्यस्तै, सोनापुर सिमेन्टले सामूहिक लगानी कोषलाई जारी गरेको आइपीको लकइन चैत २३ गते सकिने भएको छ । लगानी कोषहरूले पाएको ४ लाख २ हजार १९ कित्ता सेयर चैत २४ गतेदेखि कारोबारका लागि फकुवा हुने भएको हो । म्युचुअल फण्डले पाएको आइपीओ ६ महिनासम्म बेच्न पाउँदैनन् ।
त्यसैगरी, चैत २५ गते सिंगटी हाइड्रोपावरको संस्थापक, आयोजना प्रभावित तथा कर्मचारीलाई जारी गरेको सेयरको लकइन सकिने भएको छ । चैत २६ गतेदेखि सिंगटीको संस्थापक समूहको १ करोड १ लाख ५० हजार कित्ता, आयोजना प्रभावित स्थानीयको १४ लाख ५० हजार कित्ता र कर्मचारीको ५८ हजार कित्ता सेयर कारोबारका लागि फुकुवा हुनेछ ।
