काठमाडौं । सेयर बजारमा लगातार चौथो दिन गिरावट आएको छ । गत बिहीबारदेखि लगातार ओरालो लागेको नेप्सेले आज पनि सोही लय कायम राखेको हो । पछिल्ला ४ दिनमा मात्रै नेप्से ५० अंकले घटेको छ ।
बुधबार नेप्से परिसूचक ६.४६ अंकले घटेर २०२६.५९ विन्दुमा आइपुगेको छ । यसदिन ३१३ कम्पनीको २ अर्ब २४ करोड रुपैयाँ बढीको ६३ लाख ४१ हजार १७४ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये उत्पादनमूलक बाहेक अरु सबै समूहको परिसूचक राताम्मे भएको छ । उत्पादनमूलक समूहको परिसूचक २.८४ प्रतिशतले बढेको छ ।
आज पनि हिमालयन रिइन्स्योरेन्सको सर्वाधिक कारोबार भएको छ । यसको ११ करोड १२ लाख रुपैयाँ बढीको १ लाख ७३ हजार ५३७ कित्ता सेयर किनबेच भएको छ ।
घट्दो बजारमा पनि आज ४ कम्पनीको सेयर मूल्यमा पोजेटिभ सर्किट लागेको छ । समाज लघुवित्त, बोटलर्स नेपाल (बालाजु), हिमालयन ऊर्जा र बोटलर्स नेपाल (तराई)कोसेयर मूल्य १० प्रतिशतले बढेको छ ।
आज पिपुल्स हाइड्रोपावरका सेयरधनीले भने सर्वाधिक ७.८४ प्रतिशत गुमाएका छन् ।
