काठमाडौं । काठमाडौं महानगरपालिकाले आजदेखि न्युरोड क्षेत्रमा सवारीसधान पार्किङमा रोक लगाएको छ ।
महानगर प्रहरीले न्युरोड क्षेत्रको कालोपत्र सडक क्षेत्रमा पार्किङ रोक लगाएको हो । मंगलबार बिहानदेखि नै प्रहरीले न्युरोड क्षेत्रमा पार्किङ गरिएका सवारी साधन समेत हटाएका थिए ।
यस्तै, महानगर प्रहरीले न्यूरोड क्षेत्रको सडकमा ‘नो पार्किङ’ लेखिएको बोर्डहरु राखेको छ । साथै, सो क्षेत्रको सडक सरसफाइ समेत गरेको छ ।
महानगरले न्युरोडको पार्किङको विकल्पमा काठमाडौं टावरमा निःशुल्क पार्किङ सुविधा उपलब्ध गराइएको छ ।
महानगर प्रहरी बलका प्रमुख नगर प्रहरी वरिष्ठ उपरीक्षक राजुनाथ पाण्डेले विकल्पमा काठमाडौं टावरमा ३०० वटा चारपाङ्ग्रे र ७०० वटा दुईपाङ्ग्रे सवारी साधन पार्किङ गर्न सकिने जानकारी दिए ।
उनले धर्मपथ, जुद्ध सालिकदेखि इन्द्रचोकतर्फको सडक खण्ड, खिचापोखरी, महाबौद्ध, वीरअस्पताल वरपरको कालोपत्र सडकमा पार्किङ निषेध गरिएको बताए । यसअघि झोँछे क्षेत्रमा सवारी पार्किङ निषेध कार्यान्वयन गरिसकिएको छ ।
