काठमाडौं । राष्ट्रिय स्वतन्त्र पार्टीका सभापति रवि लामिछानेले आफ्नो खातामा सहकारीको कुनै पैसा जम्मा नभएको बताएका छन् । सोमबार पत्रकार सम्मलेनमा आज कान्तिपुर दैनिकमा प्रकाशित समाचारको खण्डन गर्दै उनले यस्तो बताएका हुन् ।
आज कान्तिपुरले लामिछानेको खातामा सहकारीको १ करोड ८० लाख रुपैयाँ जम्मा गरिएको भन्ने समाचार लेखेको थियो । उनले सो बारे स्ष्पष्ट पार्दै आफ्नो खातामा कुनै रकम जम्मा नभएको तर प्रमाण बिनै समाचार लेखेको बताए ।
‘बैंकले नै पत्र दिएको छ, मेरो खातामा चेक जम्मा भएको हो । तर, पैसा नभएर जम्मा नभएको भन्ने बैंकले स्पष्ट पारेको छ,’ उनले भने ।
तत्कालीन कम्पनीको सेयर मिलान गर्न व्यवस्थापनले आफ्नो नाममा पैसा जम्मा गर्न चेक बैंकलाई दिएको भए पनि खातामा पैसा नआएको लामिछानेले बताए । ‘मेरो खातामा चेक जम्मा गर्न भौचर भरियो । तर, त्यो चेक मेरो खातामा जम्मा भएन फिर्ता गयो,’ उनले भने ।
उनले आफ्नो बैंकखाता समेत जुानसुकै निकायले हेर्न सक्ने बताए । ‘कुनै पनि निकायले मेरो बैंक खाता हेरे हुन्छ । सम्पत्ति शुद्धीकरण, प्रहरीले हेर्न मिल्छ । यो रकम आएको भए म जुनसुकै सजाय भोग्न तयार छु,’ उनले भने ।
उनले कान्तिपुरले तथ्य प्रमाण बिनै जबरजस्ती सहकारी ठग भनी स्थापित गर्न खोजेको उनले बताए ।
