काठमाडौं । सेयर बजारमा लगातार वृद्धि भएको छ । आइतबार एकैदिन १११ अंकले बढेको नेप्से सोमबार १५ अंकले घटेको थियो ।मंगलरबारदेखि फेरि उकालो लागेको नेप्सेले आज पनि सोही लय कायम गरेको हो ।
यससाता नेप्से समग्रमा १४२ अंकले बढेको छ । पछिल्लो समय बैंकिङ प्रणालीमा कायम अधिक तरलता, घट्दो ब्याजदर, राष्ट्र बैंकको लचकता लगायत कारणले नेप्सेले लय समातेको छ ।
बजार बढ्ने विश्वासमा खरिदकर्ता सक्रिय हुँदा कारोबार रकम पनि उत्साहजनक रहेको छ । आज पनि ३ अर्ब १५ करोड रुपैयाँ बढीको सेयर किनबेच भएको छ ।
बिहीबार नेप्से परिसूचक ६.५५ अंकले बढेर १९९४.६० विन्दुमा पुगेको छ । यस दिन ३०० कम्पनीको ९६ लाख ३७ हजार ४४५ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये ८ समूहको परिसूचक बढेको छ भने ५ को घटेको छ । अन्य समूहको परिसूचक १.५१ प्रतिशतले बढेको छ ।
आज सोनापुर सिमेन्टको सर्वाधिक कारोबार भएको छ । यसको १६ करोड रुपैयाँ बढीको सेयर किनबेच भएको छ ।
सामान्य अंकले बढेको बजारमा आज ८ कम्पनीको मूल्यमा पोजेटिभ सर्किट लागेको छ । बोटलर्स नेपाल (बालाजु), हिमालयन लघुवित्त, नेशनल हाइड्रो डेभलपमेन्ट र नेपाल रिपब्लिक मिडियाको सेयर मूल्य ठ्याक्कै १० प्रतिशतले बढेको छ ।
त्यस्तै, नेपाल इन्स्योरेन्स, दोल्ती पावर, मिड सोलु हाइड्रोपावर र मृक्तिनाथ कृषि कम्पनीका सेयरधनीले पनि करिब १० प्रतिशत कमाएका छन् ।
