काठमाडौं । नेपाली सेयर बजारमा ‘ब्लुचिप’ मानिने नबिल बैंकका सेयरधनीले एकैदिन साढे १२ अर्ब रुपैयाँ बराबराको सम्पत्ति गुमाएका छन् ।
बिहीबार (मंसिर ७ गते) बैंकले गत आर्थिक वर्ष २०७९/८० को मुनाफाबाट इतिहासकै कम ११ प्रतिशत नगद (करसहित) दिने घोषणा गरेको थियो । सो लगत्तै बैंकको सेयर मूल्यमा भारी गिरावट आउँदा लगानीकर्ताले एकैदिन साढे १२ अर्ब गुमाएका हुन् ।
बिहीबार बैंकको सेयर मूल्य प्रतिकित्ता ४६ रुपैयाँ अर्थात् ८.२० प्रतिशतले घटेर प्रतिकित्ता ५१५ रुपैयाँमा आयो । बुधबार बैंकको कुल बजार पूँजीकरण १ खर्ब ५१ अर्ब ७८ करोड रहेकोमा बिहीबार साढे १२ अर्बले घटेर १ खर्ब ३९ अर्ब ३४ करोड रुपैयाँमा झर्यो । यस अनुसार लगानीकर्ताले एकैदिनमा साढे १२ अर्ब रुपैयाँ गुमाएका हुन् ।
नबिल बैंकले विगतका वर्षहरुमा बम्पर लाभांश दिँदै आएको थियो । बैंकले यसअघिका वर्षहरुमा न्यूनतम ३० देखि अधिकतम १४० प्रतिशतसम्म लाभांश दिएको थियो ।
२ वर्षअघि नेपाल बंगलादेश बैंकलाई गाभेर चुक्ता पूँजीका आधारमा तेस्रो ठूलो बैंक बनेपछि नबिलको लाभांश क्षमतामा उच्च गिरावट आएको हो । चुक्ता पूँजीको अनुपातमा नाफा बढाउन नसक्दा बैंकका लाभांश क्षमता ह्वात्तै घटेको हो । जसकारण विगतमा बम्पर लाभांश दिँदै आएको नबिलले यस वर्ष अन्य बैंककोभन्दा पनि कम लाभांश दिएको छ । हाल नबिलको चुक्ता पूँजी २७ अर्ब ५ करोड रुपैयाँ छ । लाभांश कम दिए पनि समग्रमा नबिल बैंक वाणिज्य बैंकहरुमा अधिकांश सूचकमा शीर्ष स्थानमै रहन सफल छ ।
नेपाल स्टक एक्सचेन्ज (नेप्से)मा सूचीकृत १९ वाणिज्य बैंकमध्ये सबैभन्दा महँगो सेयर मूल्य हुने बैंकका रुपमा रहेको नबिल हिजोदेखि दोस्रोमा झरेको छ । नबिललाई सेयर मूल्यमा स्ट्याण्डर्ड चार्टर्डले उछिनेको हो । सबैभन्दा महँगो बैंक चार्टर्डको अन्तिम कारोबार सेयर मूल्य ५२४ रुपैयाँ छ ।
