काठमाडौं । सेयर बजारमा उछाल आएको छ । मंगलबार १३ अंकले बढेको नेप्सेमा आज एकैदिन ४३ अंकले बढेको हो ।पछिल्ला दुई दिनमै नेप्से ५६ अंकले बढेको छ ।
नेपाल धितोपत्र बोर्डले ब्रोकर कमिसन घटाउने निर्णय गरेसँगै लगानीकर्ता उत्साही हुँदा नेप्सेमा उच्च अंकको वृद्धि आएको हो ।
बुधबार नेप्से परिसूचक ४३.२७ अंकले बढेर १९०७.८९ विन्दुमा पुगेको छ । सुचकमा सुधार आए पनि कारोबार रकम भने घटेको छ । अघिल्लो दिनको तुलनामा कारोबार रकम ७ करोडले घटेर ९३ करोडमा सीमित भएको छ ।
आज २८६ कम्पनीको ३७ लाख ७२ हजार २३ कित्ता सेयर किनबेच भएको छ । कारोबारमा आएका १३ वटै समूहको परिसूचक बढेको छ । निर्जीवन बीमा समूहको परिसूचक सबैभन्दा धेरै २.८७ प्रतिशतले बढेको छ ।
आज सानिमा जनरल इन्स्योरेन्सको सर्वाधिक कारोबार भएको छ । यसको झन्डै साढे ४ करोड रुपैयाँको सेयर किनबेच भएको छ ।
उच्च अंकले बढेको बजारमा आज दुई कम्पनीको सेयर मूल्यमा पोजेटिभ सर्किट लागेको छ । आशा लघुवित्त र इन्फिनिटी लघुवित्तका सेयरधनीले १० प्रतिशत कमाएका छन् ।
