काठमाडौं । सर्वोत्तम सिमेन्टले प्राथमिक साधरण सेयर (आइपीओ) निष्काशन गर्न अनुमति पाएको छ । नेपाल धितोपत्र बोर्डलेले कम्पनीलाई बुक बिल्डिङ विधिबाट आइपीओ जारी गर्न स्वीकृति दिएको हो ।
यससँगै सर्वोत्तम सिमेन्ट बुक बिल्डिङ विधिबाट आइपीओ निष्काशन गर्ने पहिलो कम्पनी हुने भएको छ । कम्पनीले बोर्डमा आवेदन दिएको १५ महिनापछि आइपीओ जारी गर्न स्वीकृति पाएको हो । सर्वोत्तमले २०७९ असार २८ गते आइपीओ निष्काशनको अनुमती माग्दै बोर्डमा निवेदन दिएको थियो ।
बोर्डले पहिलो चरणमा योग्य संस्थागत लगानीकर्तालाई सार्वजनिक निष्काशन हुने सेयरको ४० प्रतिशत अर्थात् २४ लाख कित्ता सेयर बुक बिल्डिङ विधिबाट निष्काशन गर्न स्वीकृति दिएको हो ।
कम्पनीले संस्थागत लगानीकर्तालाई प्रतिकित्ता ४०१ रुपैयाँदेखि अधिकतम ६०१ रुपैयाँमा आइपीओ बिक्री गर्न अनुमति पाएको हो । कम्पनीको आधार मूल्य ५०१ रुपैयाँ तय गरी सो मूल्यको २० प्रतिशत तलमाथि जानसक्ने व्यवस्था अनुसार मूल्य निर्धारण गरिएको हो ।
कम्पनीले योग्य संस्थागत लगानीकर्ताबाट लिएको आशयक मूल्यका आधारमा आधार माथिल्लो सीमा ७५१.५० रुपैयाँ र तल्लो सीमा ५०१ रुपैयाँ हुनेगरी बोर्डमा आवेदन दिएको थियो । तर, बोर्डले मूल्य घटाएर आइपीओ जारी गर्न अनुमति दिएको हो ।
कम्पनीले संस्थागत लगानीकर्तालाई बुक बिल्डिङबाट आइपीओ बिक्री गरिसकेपछि दोस्रो चरणमा सर्वसाधरणका लागि ३६ लाख कित्ता सेयर जारी गर्नेछ ।
