काठमाडौं । सेयर बजारमा दोहोरो अंकको गिरावट आएको छ । मंगलबार १७ अंकले घटेको नेप्से बुधबार ९ अंकले बढे पनि आज फेरि दोहोरो अंकले घटेको हो ।
बिहीबार नेप्से परिसूचक ११.०४ अंकले घटेर १९५६.५२ विन्दुमा आइपुगेको छ । सूचकसँगै आज कारोबार रकममा पनि गिरावट आएको छ । अघिल्लो दिनको तुलनामा कारोबार रकम ९ करोड घटेर १ अर्ब १० करोडमा सीमित भएको छ । यसदिन २८० कम्पनीको ३५ लाख ६२ हजार ६२४ कित्ता सेयर किनबेच भएको छ ।
आज कारोबारमा आएका १३ वटा समूहमध्ये म्युचुअल फण्ड बाहेक अरु सबैको परिसूचक घटेको छ । होटल समूहको परिसूचक सबैभन्दा धेरै १.१७ प्रतिशतले घटेको छ ।
आज पनि सिटिजन लाइफ इन्स्योरेन्सको सर्वाधिक कारोबार भएको छ । यसको झन्डै साढे ४ करोड रुपैयाँको सेयर किनबेच भएको छ ।
घट्दो बजारमा आज इन्फिनिटी लघुवित्तका सेयरधनीले सर्वाधिक ९.९४ प्रतिशत गुमाएका छन् भने बाराही हाइड्रोपावरका सेयरधनीले ९.३० प्रतिशत कमाएका छन् ।
