काठमाडौं । काठमाडौं–तराई–मधेस द्रुतमार्ग (फाष्ट ट्रयाक) थप तीन सुरुङमार्ग निर्माणका लागि ठेक्का आह्वान गरिएको छ । सरकारले फास्ट ट्रयाकको विस्तृत आयोजना प्रतिवेदन (डीपीआर) संशोधन लगत्तै काठमाडौं–तराई–मधेस द्रुतमार्ग आयाेजनाले सुरुङमार्ग निर्माणका लागि ठेक्का आह्वान गरेको हो ।
हाल फास्ट ट्रयाक अन्तर्गत ३ वटा सुरुङमार्ग निर्माण भइरहेका छन् । डीपीआर संशोधन भएसँगै थप ३ वटा सुरु निर्माण गर्न लागिएको हो ।
नेपाल सेनाका प्रवक्ता कृष्णप्रसाद भण्डारीले फास्ट ट्रयाकमा थप ३ वटा सुरुङ निर्माणका लागि ठेक्का आह्वान गरिएको जानकारी दिए । उनले कुल २.२ किलोमिटर लामो ३ सुरुङ निर्माणका लागि ठेक्का आह्वान गरिएको बताए ।
उनका अनुसार प्याकेज नम्बर ८ र १० भित्र नयाँ सुरुङ बनाइने छ । नयाँ सुरुङको लम्बाइ क्रमशः ३०० मिटर, ९०० मिटर र १ किलोमिटर रहको उनले बताए । फास्ट ट्रयाकको प्रस्थानविन्दुबाट (खोकना)बाट १२ किलोमिटर र २४ किलोमिटरमा पर्ने चन्द्राङभिर र रामचन्द्र भिरमा ३ वटा सुरुङ बनाउन लागिएको हो ।
२ प्याकेजमा ठेक्का आह्वान गरी सुरुङको निर्माण गर्ने तयारी गरिएको सेना प्रवक्ता भण्डारीले बताए । ‘हामीले थप गरिएको नयाँ सुरुङ निर्माणका लागि ठेक्का आह्वान गरिसकेका छौँ, अब चाँडै निर्माण पनि सुरु गर्नेछौँ,’ प्रवक्ता भण्डारीले चाणक्य पोष्टसँग भने ।
भदौ १ गते आह्वान गरिएको उक्त ठेक्का असोज २३ गतेसम्मका लागि खुला गरिएको छ । कात्तिकभित्रै ठेक्का प्रक्रिया टुंग्याइ निर्माण थालिने उनले बताए । ठेक्का आवह्ना गरिएका सहित फास्ट ट्रयाकमा सुरुङको संख्या ६ वटा पुग्नेछ भने कुल लम्बाइ ८.६ किलोमिटर हुनेछ ।
हाल आयोजना अन्तर्गत कुल ६.४ किलोमिटर लामो ३ वटा सुरुङमार्ग निर्माण भइरहेको छ । आयोजना अन्तर्गत महादेवटारमा ३.३५५ किलोमिटर, धेद्रेमा १.६३० किलोमिटर र लेनडाँडामा १.४३० किलोमिटर सुरुङ खन्ने काम भइरहेको छ ।
हालसम्म महादेवटार सुरुङ निर्माणमा दाँयामा २०३ मिटर र बाँया २३५ मिटर सुरुङ खन्ने काम भएको छ । त्यस्तै, प्याकेज २ मा धेद्रे र लेनडाँडाको सुरुङ निर्माण भइरहेको छ । यसमा धेद्रेतर्फ र लेनडाँडातर्फ समेत सुरुङ खन्ने कामले गति लिइरहेको उनले बताए ।
काठमाडौं–मधेशको ‘लाइफ लाइन’ का रुपमा हेरिएको द्रुतमार्ग नेपाली सेनाको व्यवस्थापनमा निर्माण भइरहेको छ । विसं २०७४ वैशाख २१ देखि निर्माण सुरु गरिएको काठमाडौँ–तराई–मधेश द्रुतमार्ग हालसम्म २५.५४ प्रतिशत मात्र प्रगति भएको छ ।
तोकिएको म्याद २०८१ भित्रै निर्माण सम्पन्न हुन नसक्ने देखिएपछि आयोजनाको म्याद थपेर २०८३ साल चैत मसान्तसम्म पुर्याइएको छ । चालु आर्थिक वर्षमा फाष्ट ट्रयाक निर्माणका लागि २२ अर्ब ५० करोड रुपैयाँ बजेट विनियोजन गरिएको छ ।
