काठमाडौं । समाज लघुवित्त वित्तीय संस्थाको सेयर मूल्य समायोजन भएको छ । लघुवित्तले साधारण सभा तथा लाभांश वितरण प्रयोजनार्थ बुकक्लोज गरेसँगै नेप्सेले सेयर मूल्य समायोजन गरी नयाँ मूल्य निर्धारण गरेको हो।
लघुवित्तले गत आव २०७८/७९ को नाफाबाट वितरण गर्ने १४.२५ प्रतिशत बोनसपछि मूल्य समायोजन भएको हो । नेप्सेका अनुसार समायोजनपछि लघुवित्तको नयाँ सेयर मूल्य ६५.५६ रुपैयाँ कायम भएको छ ।
अब यही समायोजित मूल्यका आधारमा आइतबार कम्पनीको दोस्रो बजारमा सेयर कारोबार खुल्ने छ। २०७७ भदौमा आइपीओ जारी गरी नेप्सेमा सूचीकृत भएको लघुवित्तको लामो सयम सेयर कारोबार रोक्का भएको थियो । ३ वर्षपछि गत असारदेखि कारोबार फुकुवा भए पनि लघुवित्तको सेयर कारोबार हुन सकेको छैन ।
अंकित मूल्यभन्दा कममा कारोबार खुलेकाले सेयरधनीले लघुवित्तको सेयर बिक्री गर्न चाहेका छैनन् । प्रतिकित्ता ७२.१ रुपैयाँ कारोबार सुरु भएको समाजको हालसम्म जम्मा ५१ कित्ता सेयर कारोबार भएको छ भने सेयर मूल्य ७४.९० रुपैयाँ पुगेको थियो । गत वर्षको बोनसपछि मूल्य समायोजन हुँदा लघुवित्तको सेयर मूल्य ६५ रुपैयाँमा झरेको हो । अहिले नेप्सेमा सूचीकृत लघुवित्तहरुको सेयर मूल्य ५०० रुपैयाँदेखि २ हजार रुपैयाँसम्म रहेको छ ।
लघुवित्तले गत वर्ष कुल १५ प्रतिशत (बोनस १४.२५ र नगद ०.७५ प्रतिशत)लाभांश दिएको थियो । बोनस वितरणपछि लघुवित्तको चुक्ता पूँजी २ करोड २८ लाख रुपैयँँ पुगेको छ ।
