काठमाडौं । सेयर बजारमा करेक्शन आएको छ । ९ दिनमा लगातार १९२ अंकले बढेको नेप्सेमा आज झिनो अंकको करेक्शन आएको हो ।
सूचकमा करेक्शन आए पनि कारोबार रकम भने उत्साहजनक नै रहेको छ । आज ४ अर्ब ७४ करोड रुपैयाँ बढीको सेयर किनबेच भएको छ ।
सोमबार नेप्से परिसूचक २.९४ अंकले घटेर २०९१.३९ विन्दुमा आइपुगेको छ । यसदिन २७६ कम्पनीको १ करोड २९ लाख ७५ हजार १६८ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये ५ उपसमूहको परिसूचक बढेको छ घने ८ को घटेको छ । फाइनान्स उपसमूहको परिसूचक ५.२२ प्रतिशतले बढेको छ ।
आज पनि शिवम् सिमेन्टको सर्वाधिक कारोबार भएको छ । यसको झन्डै ३० करोड रुपैयाँको सेयर किनबेच भएको छ । त्यस्तै, नेपाल टेलिकम १८ करोड र सोल्टी होटल साढे १७ करोड बढीको कारोबार हुँदै शीर्ष तीनमा रहे ।
घट्दो बजारमा पनि आज आधादर्जन कम्पनीको सेयर मूल्यमा पोजेटिभ सर्किट लागेको छ । सेन्टर फाइनान्स, लक्ष्मी इक्विीटी फण्ड, माउन्टेन इनर्जी, बीपीडब्ल्यू लघुवित्त, मेन्छियाम हाइड्रोपावर र सिटी होटलको सेयर मूल्य १० प्रतिशतले बढेको छ ।
