काठमाडौं । सेयर बजार करेक्शन आएको छ । जेठ २ गतेदेखि लगातार उकालो लागेको नेप्सेमा १२३ अंकको बढोत्तरीपछि करेक्शन आएको हो ।
सूचकमा गिरावट आए पनि कारोबार रकम भने उत्साहजनक रहेको छ । आज २ अर्ब ६३ करोड रुपैयाँ बढीको सेयर किनबेच भएको छ ।
आइतबार नेप्से परिसूचक १७.३८ अंकले घटेर १९४१.७४ विन्दुमा आइपुगेको छ । यसदिन २७० कम्पनीको ७० लाख ५० हजार ३९ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये उत्पादनमूलक र सामूहिक लगानी कोषबाहेक अरु सबै समूहको परिसूचक राताम्मे भएको छ । होटल उपसमूहको परिसूचक सबैभन्दा धेरै २.७७ प्रतिशतले घटेको छ ।
आज शिवम् सिमेन्टको सेयरमा लगानीकर्ताको उच्च आकर्षण देखिएको छ । यसको झन्डै २२ करोड रुपैयाँ बढीको सेयर किनबेच भएको छ ।
घट्दो बजारमा पनि आज दुई कम्पनीको सेयर मूल्यमा पोजेटिभ सर्किट लागेको छ । आत्मनिर्भर लघुवित्त र युनियन लाइफ इन्स्योरेन्सको सेयर मूल्य १० प्रतिशतले बढेको छ ।
