काठमाडौं । सेयर बजारमा लगातार पाँचौ दिन वृद्धि भएको छ । गत मंगलबारदेखि उकालो लागेको नेप्सेले आज पनि सोही लय कायम राखेको हो ।
सूचक बढे पनि आज कारोबार रकम भने घटेको छ । अघिल्लो दिनको तुलनामा कारोबार रकम ३३ करोडले घटेर १ अर्ब २७ करोड रुपैयाँमा सीमित भएको छ ।
सोमबार नेप्से परिसूचक ८.१० अंकले बढेर १८९१.३१ विन्दुमा पुगेको छ । यसदिन २७२ कम्पनीको ३४ लाख ९५ हजार ७५२ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये बैंकिङ र व्यापार बाहेक अरु सबै उपसमूहको परिसूचक बढेको छ । उत्पादनमूलक उपसमूहको परिसूचक सबैभन्दा धेरै २.४४ प्रतिशतले बढेको छ ।
आज शिवम् सिमेन्टको सर्वाधिक कारोबार भएको छ । यसको ७ करोड रुपैयाँ बढीको सेयर किनबेच भएको छ । त्यस्तै, सोल्टी होटल ६ करोड र ओरेन्टल होटलको ५ करोड बढीको कारोबार हुँदै शीर्ष तीनमा रहे ।
बढ्दो बजारमा आज आत्मनिर्भर लघुवित्तको सेयर मूल्यमा पोजेटिभ सर्किट लागेको छ । यसका सेयरधनीले ठ्याक्कै १० प्रतिशत कमाएका छन् ।
यसैगरी, युनिलिभर नेपाल ७.०१, गुडविल फाइनान्स ६.२३, सामुदायिक लघुवित्त ५.३६, मायाखेला हाइड्रोपावर र बीपीडब्ल्यू लघुवित्तको सेयर मूल्य ४ प्रतिशतले बढेको छ ।
