काठमाडौं । सेयर बजारमा उछाल आएको छ । वैशाखदेखि निक्षेपको ब्याजदर घट्ने समाचार बाहिरिएसँगै नेप्सेमा उछाल आएको ।
बुधबार दिउँसो साढे १२ बजेसम्म नेप्से परिसूचक ५६ अंकले बढेर १९२७ विन्दुमा पुगेको छ । निक्षेपको ब्इाजदर घटेसँगै वैशाखदेखि कर्जाको ब्याजदर समेत घट्ने भएकाले लगानीकर्ताको मनोबल बढ्दा नेप्सेले छलाङ मारेको हो । यद्यपि, यो कति टिकाउ हुन्छ भन्ने हेर्न बाँकी छ ।
बुधबार बिहान बसेको नेपाल बैंकर्स संघको बैठकले वैशाखदेखि लागू हुने गरी निक्षेपको ब्याजदर १० प्रतिशत कम अर्थात् ९।९९ प्रतिशत कायम गर्ने निर्णय गरेको हो ।
संघका अनुसार अब वैशाखदेखि व्यक्तिगत मुद्दती निक्षेपको ब्याजदर ९.९९ प्रतिशत र संस्थागत मुद्दतीको ब्याजदर ७।९९ प्रतिशत कायम हुनेछ । हाल व्यक्तिगत मुद्दती निक्षेपको ब्याजदर ११।११ प्रतिशत र संस्थागत मुद्दतीमा ९.११ प्रतिशत थियो ।
यस्तै, बचतमा न्यूनतम ५.४ प्रतिशत र अधिकतम ७.४ प्रतिशत कायम गर्ने सहमति भएको संघले जनाएको छ । अब बैंकहरुले वैशाखमा माघदेखि घटेको निक्षेपको ब्याजदरका आधारमा बेसरेट पनि घट्ने र सोही आधारमा कर्जाको ब्याजदर घटाउने छन् ।
नेप्सेमा उछाल आएसँगै कारोबार समेत बढेको छ । डेढ घण्टामै ७५ करोड बढीको कारोबार भइसकेको छ । जबकी यसअघि दैनिक औसतमा १ अर्ब हाराहारीमा कारोबार हुँदै आएको छ ।
बढ्दो बजारमा लगानीकर्ता शिवम् सिमेन्ट, हिमालयन डिस्ट्रीलरी, एनआइसी एशिया, अपि पावर, हिमाल दोलखा, नबिल बैंक, रिडी पावर लगायत कम्पनीको सेयरमा आकर्षित भएका छन् ।
