काठमाडौं । नेपाल स्टक एक्स्चेन्ज (नेप्से)मा सूचीकृत तीन लघुवित्त कम्पनीको लाभांश पाउन सेयर किन्ने आज (फागुन ३० गते) अन्तिम दिन रहेको छ । आरएमडीसी, समता घरेलु र मनकामना स्मार्ट लघुवित्तको लाभांश सुरक्षित गर्ने आज अन्तिम दिन हो ।
तीनै लघुवित्तले साधरणसभा तथा लाभांश प्रयोजनका लागि भोलि (चैत १ गते) बुकक्लोज तोकेका छन् । सो अनुसार आजसम्म नेप्सेमा कारोबार भइ कायम रहने सेयरधनीले मात्र प्रस्तावित लाभांश पाउने छन् ।
आरएमडीसी लघुवित्तले गत आर्थिक वर्ष २०७८/७९ को मुनाफाबाट २६ प्रतिशत बोनस सेयर र कर प्रयोजनका लागि १.३६ प्रतिशत नगद गरी कुल २७.३६ प्रतिशत लाभांश वितरण गर्ने प्रस्ताव गरेको छ ।
उक्त लाभांश पारित गर्न लघुवित्तले चैत १० गते २४औँ वार्षिक साधारणसभा बोलाएको छ । लघुवित्तको सभा कालिस्कास्थानको अमृतभोग क्याटरिङमा हुनेछ ।
त्यसैगरी, समता घरेलुले गत वर्षको नाफाबाट १५ प्रतिशत बोनस सेयर र करसहित ३ प्रतिशत नगद गरी कुल १८ प्रतिशत लाभांश घोषणा गरेको छ । सो लाभांश पारित गर्न समताले चैत ११ गते धुलिखेलको हिमालय दृष्टि रिसोर्ट साधरण सभा बोलाएको छ ।
त्यस्तै, मनकामना स्मार्ट लघुवित्तले गत वर्षको मुनाफाबाट ४.७५ प्रतिशत बोनस सेयर र कर प्रयोजनका लागि ०.२५ प्रतिशत गरी कुल ५ प्रतिशत लाभांश प्रस्ताव गरेको छ । सो लाभांश पारित गर्न लघुवित्तले चैत १६ गते वार्षिक साधरण सभा बोलाएको छ ।
तीनै कम्पनीको प्रस्तावित लाभांश साधरण सभाले पारित गरेपछि सेयरधनीले पाउनेछन् ।
