काठमाडौं । सेयर बजारमा दोहोरो अंकको कमब्याक भएको छ । गत साताको सोमबारदेखि लगातार ओरालो लागेर ९० अंकले घटेको नेप्से आज दोहोरो अंकले फर्केको हो ।
सूचकमा सुधार आए पनि कारोबार रकममा भने उत्साजनक छैन । आज करिब सवा अर्बको सेयर किनबेच भएको छ ।
मंगलबार नेप्से १४.४१ अंकले बढेर १९५२.६६ विन्दुमा पुगेको छ । यसदिन २६१ कम्पनीको १ अर्ब २० करोड रुपैयाँ बढीको ४० लाख ५९ हजार १४९ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये उत्पादनमूलक र सामूहिक लगानी कोष बाहेक अरु सबै समूहको परिसूचक बढेको छ । हाइड्रोपावर समूहको परिसूचक सबैभन्दा धेरै १.६८ प्रतिशतले बढेको छ ।
आज साल्ट ट्रेडिङको सर्वाधिक कारोबार भएको छ । यसको १२ करोड रुपैयाँ बढीको सेयर किनबेच भएको छ । त्यस्तै, हिमालयन डिस्ट्रीलरीको ९ करोड र छिमेक लघुवित्तको साढे ५ करोडको कारोबार हुँदै शीर्ष तीनमा रहे ।
दोहोरो अंकले बढेको बजारमा आज दुई कम्पनीको सेयर मूल्यमा पोजेटिभ सर्किट लागेको छ । शुभमपावरको सेयर मूल्य ठ्याक्कै १० प्रतिशतले बढेको छ भने सुपर मादी हाइड्रोपावरका सेयरधनीले पनि करिब १० प्रतिशत कमाएका छन् ।
त्यसैगरी, इमर्जिङ नेपाल ५.८०, स्वाभिमान लघुवित्त ५.४२, विशाल बजार ४.२७, कर्णाली डेभलपमेन्ट बैंक, जोशी हाइड्रोापावर, वीन नेपाल लघुवित्त र समृद्धि फाइनान्सको सेयर मूल्य साढे ३ प्रतिशतले बढेको छ ।
