काठमाडौं । काठमाडौं गोंगबुस्थित नयाँ बसपार्क भित्रै लज (बास घर) निर्माण गरिने बएको छ । नयाँ बसपार्क सञ्चालनको जिम्मा लिएको लोत्से बहुउद्देश्य प्रालिले यात्रुको सुविधाका लागि बसपाकै भित्रै लज निर्माण गर्न लागेको हो ।
गोंगबु बसपार्क देशकै सबैभन्दा ठूलो बसपार्क हो । यहाँबाट देशका ६० बढी जिल्ला बसहरु जाने आउने गर्छन् । अहिले बाहिरबाट आएका यात्रु बसपार्कमा ओर्लिएपछि बास बस्नका लागि होटल/लज खोज्न बाहिर जानुपर्ने अवस्था छ । त्यसैलाई मध्येनजर गर्दै लोत्सेले बसपार्क भित्रै सुविधायुक्त लज निर्माण गर्न लागेको हो ।
लोत्से बहुउद्देश्य प्रालिका एचआर म्यानेजर पंकज मल्लले कम्पनीले यात्रुको सुविधाका लागि बसपार्क भित्रै लज निर्माण गर्न लागेको जानकारी दिए ।
उनले २ करोड बढी लगानीमा उक्त लज बनाउन लागेको बताए । उक्त लज ३ देखि ४ तल्लाको हुने छ । ‘अहिले यात्रुलाई बसबाट ओर्लेपछि होटल लज खोज्न बाहिर जानुपर्ने बाध्यता,’ मल्ले चाणक्य पोष्टसँग भने, ‘अब यात्रुको सुविधाका लागि हामीले बसपार्क भित्रै लज निर्माण गर्न लागेका छौँ, बसपार्कको मास्टर प्लान अनुसार २ करोड बढी लगानीमा ३ तल्ले भवन निर्माण हुनेछ ।’
पहिला बिल्डङ बनाएर आवश्यकता अनुसार कोठाहरु निर्माण गर्ने योजना रहेको उनले बताए ।
अनलाइन टिकट व्यवस्था गर्ने
लोत्सेले बसपार्क भित्रको काउन्टर सञ्चालन गर्न पाए त्यसलाई पूर्ण रुपमा अन्लाइन टिकेटिङको व्यवस्था गर्ने बताए । उनले बसको प्रकार अनुसार अनलाइनबाटै बुक गरी पैसा तिरेर गाडी चढ्न मिल्ने व्यवस्था गर्ने बताए ।
उनले सरकारले टिकट काट्ने व्यवस्था अनलाइन गर्ने भने पनि बिचौलियाका कारणले त्यो कार्यन्वयन हुन नसकेको बताए । पछिल्लो समय ४८ वटा बस काउन्टर सञ्चालनमा रहेको छ । बस काउन्टर छुट्टा छुट्टै यातायात व्यवसायीले सम्हालेका छन् ।
१२२ जना रोजगार दिँदै बसपार्क
लोत्सेले बसपार्क व्यवस्थापनका लागि मात्रै १ सय बढी कर्मचारी राखेको छ । हाल बसपार्कभित्र ३४ जना सुरक्षा गार्ड रहेका छन् । सरसफाइका लागि ३६ जना खटिएका छन् । लोत्सेका ५२ जना कर्मचारी अन्य काममा खटिएको मल्लले बताए ।
अर्को बसपार्क बनाउने योजना
सरकारले सहयोग गरे अर्को पनि बसपार्क बनाउने योजना रहेको मल्लले बताए । उनले अर्को बसपार्कका लागि मुड्खुमा लिजमा जग्गा लिन आफूले हेरिरहेको बताए । तर, सरकारले सहयाेग नगरे संस्थाले मात्र बसपार्क निर्माणका लागि रिक्स लिनसक्ने अवस्था नरहेकाे उनले बताए । बताए ।
लोत्सेले निर्माण, सञ्चालन र हस्तान्तरण (बुट) प्रणाली अन्तर्गत बसपार्कको स्तरीकरण गरी सञ्चालन गर्दै आएको छ । लोत्सेले महानगरको १५६ रोपनी जग्गा लिजमा लिएर नयाँ बसपार्क संचालन गरिरहेको छ । बसपार्कभित्र वहुउद्देश्य व्यापारिक कम्प्लेक्ससहित बसपार्क २४ घण्टा बिजुली, सर्भिस सेन्टर, सीसी टीभी, ट्राफिक पुलिस सुविधा रहेको मल्लले बताए ।
उनका अनुसार बसपार्क भित्र अफिस, मल, टर्मिनल विल्डिङ, वासिङ सेन्टर, मेन्टेनेन्स, लगेज हब सबै सुविधा राखिएको छ । हालसम्म लोत्सेले बसपार्क निर्माण तथा व्यवस्थापनमा २ अर्ब बढी रकम खर्च गरिसकेको उनले बताए ।
