काठमाडौं । सेयर बजारमा उछाल आएको छ । हाइड्रोपावर कम्पनीहरुको सेयर मूल्यमा उछाल आउँदा नेप्से उच्च अंकले बढेको हो ।
सूचकमा उछाल आए पनि आज कारोबार रकममा भने झिनो गिरावट आएको छ । अघिल्लो दिनको तुलनामा कारोबार रकम १५ करोडले घटेर सवा ५ अर्बको सेयर किनबेच भएको छ ।
सोमबार नेप्से ४७.१५ अंकले बढेर २२११.३८ विन्दुमा पुगेको छ । यसदिन २५७ कम्पनीको ५ अर्ब ३१ करोड रुपैयाँ बढीको १ करोड ४६ लाख ७६ हजार २०६ कित्ता सेयर किनबेच भएको छ ।
आज कारोबारमा आएका १३ वटा उपसमूह मध्ये होटल बाहेक अरु सबै उपसमूहको परिसूचकमा हरियाली छाएको छ । हाइड्रोपावर समूह सबैभन्दा धेरै ४.९४ प्रतिशतले बढेको छ ।
आज रिडी पावरको सर्वाधिक कारोबार भएको छ । यसको २० करोड रुपैयाँ बढीको सेयर किनबेच भएको छ । त्यस्तै, ङादी ग्रुप १७ करोड र एनआइसी एशिया बैंक साढे १६ करोड बढीको कारोबार हुँदै शीर्ष तीनमा रहे ।
उच्च अंकले बढेको बजारमा आज एक दर्जन कम्पनीको सेयर मूल्यमा पोजेटिभ सर्किट लागेको छ । हिमालयन ऊर्जा, युनियन, सिंगटी हाइड्रोपावर र खप्तड लघुवित्तको सेयर मूल्य ठ्याक्कै १० प्रतिशतले बढेको छ ।
त्यसैगरी, राधी विद्युत्, बाराही हाइड्रोपावर, पिपुल्स हाइड्रोपावर, हिमालयन पावर र पञ्चकन्यामाइ हाइड्रोपावरका सेयरधनीले पनि करिब १० प्रतिशत कमाएका छन् ।
