काठमाडौं । कालिञ्चोक दर्शन लिमिटेडले माघ ३ गतेदेखि प्राथमिक साधरण सेयर (आइपीओ) निष्काशन गर्ने भएको छ ।
कम्पनीले सर्वसाधरणका लागि प्रतिकित्ता १०० रुपैयाँ दरले ८ करोड ९६ लाख ४० हजार रुपैयाँ बराबरको ८ लाख ९६ हजार ४०० कित्ताका आइपीओ निष्काशन गर्न लागेको हो ।
लगानीकर्ताले न्यूनतम १० कित्तादेखि अधिकतम ४ हजार ९९० कित्ताका लागि आवेदन दिन सक्नेछन्। उक्त आइपीओमा लगानीकर्ताले माघ ६ गतेसम्म आवेदन दिनु पर्नेछ । सो अवधिमा सबै सेयर विक्री नभएमा मात्र माघ १७ गतेसम्म आवेदन दिन पाइने छ ।
लगानीकर्ताले नेपाल धितोपत्र बोर्डबाट सी आस्वा अनुमति प्राप्त सम्पूर्ण सी-आस्बा सदस्य बैंक तथा वित्तीय संस्था, तिनका शाखा कार्यालयहरुका साथै मरोसेयर मार्फत आवेदन दिन सक्नेछन् ।
कम्पनीले यसअघि वैदेशिक रोजगारीमा रहेका नेपाली, आयोजना प्रभावित क्षेत्र दोलखाबासी, सामूहिक लगानी कोषका लागि आइपीओ निष्काशन गरी बाँडफाँट गरिसकेको छ ।
कम्पनीको सेयर निष्काशन तथा बिक्री प्रबन्धक नबिल इन्भेष्टमेन्ट बैंकिङ लिमिटेड रहेको छ। कम्पनीले आइपीओ निष्काशनका लागि गराएको रेटिङमा केयर रेटिङ नेपालले केयर एनपी डबल बी प्लस इस्यूअर रेटिङ दिएको छ । यसले कम्पनीको दायित्व बहन गर्ने क्षमतामा मध्यस्तरको जोखिम रहेको संकेत गर्दछ।
