काठमाडौं । एनआइसी एशिया बैंक नेपाली सेयर बजारमा सबैभन्दा महँगो सेयर मूल्य हुने वाणिज्य बैंक बनेको छ । नबिल बैंकलाई उछिन्दै एनआइसी सबैभन्दा धेरै सेयर मूल्य हुने बैंक बनेको हो ।
नबिलले गत वर्षको नाफाबाट घोषणा गरेको १८.५ प्रतिशत बोनस सेयरका आधारमा मूल्य समायोजन भएपछि सेयर मूल्यका आधारमा एनआइसीभन्दा पछि परेको हो ।
सोमबार (११:१० बजे)सम्म नबिल बैंकको सेयर मूल्य प्रतिकित्ता ७३१ रुपैयाँ रहेको छ भने एनआइसीको ७ रुपैयाँ बढी अर्थात् ७३८ रुपैयाँ रहेको छ । यो नेप्सेमा सूचीकृत २५ वटा वाणिज्य बैंक मध्ये सबैभन्दा धेरै हो ।
पछिल्लो एक सातायता एनआइसीको सेयर मूल्य ह्वात्तै बढेको छ । एक हप्ताको अवधिमा एनआइसीको सेयर मूल्य प्रतिकित्ता ६० रुपैयाँभन्दा धेरैले बढेको छ ।
वर्षेनी बम्पर लाभांश दिँदै आएको नबिल बैंकको सेयर संख्या बढेसँगै पछिल्ला वर्षहरुमा सेयर मूल्य बढ्न सकेको छैन । एनआइसी एशियाले भने विगत २ वर्षदेखि सेयरधनीलाई कुनै लाभांश दिएको छैन ।
हाल नेप्सेमा नबिलको २७ करोड ५ लाख कित्ता सेयर सूचीकृत छ भने एनआइसीको ११ करोड ५६ लाख कित्ता मात्र सूचीकृत । कर्जा, निक्षेप, खुद नाफा लगायत अधिकांश सूचकमा एनआइसी र नबिलको टक्कर रहँदै आएको छ ।
