काठमाडौं । सेयर बजारमा उछाल आएको छ । लामो समयदेखि ओरालो लागेको नेप्से आज नयाँ सरकार बनेसँगै उछाल आएको हो ।
नयाँ अर्थमन्त्री विष्णु पौडेल बन्ने भएसँगै लगानीकर्ता उत्साहित हुँदा नेप्सेले छलाङ मारेको हो ।नेकपा एमालेले उपाध्यक्ष पौडेललाई उपप्रधान तथा अर्थमन्त्रीमा पठाउने भएको छ ।
पौडेल विगतमा पनि सेयर बजारमैत्री अर्थमन्त्रीका रुपमा चिनिएका थिए । नेप्सले यसअघि २०७३ र २०७८ मा अल टाइम हाइको रेकर्ड बनाउँदा पौडेल नै अर्थमन्त्री थिए ।
सूचकसँगै आज कारोबार रकममा भनि ठूलो बढोत्तरी आएको छ । औसतमा दैनिक १ अर्ब हाराहारी कारोबार हुँदै आएकोमा आज २ अर्ब ९ करोड रुपैयाँ बढीको कारोबार भएको छ ।
सोमबार नेप्से ५६.८८ अंकले बढेर १९२४.०९ विन्दुमा पुगेको छ । यसदिन २५० कम्पनीको २ अर्ब ९ करोड रुपैयाँ बढीको ५६ लाख ५३ हजार ५३ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये अन्य समूह बाहेक अरु सबै उपसमूह्को परिसूचकमा हरियाली छाएको छ । फाइनान्स उपसमूह सबैभन्दा धेरै ६.५२ प्रतिशतले घटेको छ ।
आज नेपाल टेलिकमको सर्वाधिक कारोबार भएको छ । यसको पौने २१ करोड बढीको सेयर किनबेच भएको छ । त्यस्तै, हिमालयन डिस्ट्रीलरीको ११ करोड र नबिल बैंक ९ करोड बढीको कारोबार हुँदै शीर्ष तीनमा रहे ।
उच्च अंकले बढेको बजारमा झन्डै १ दर्जन कम्पनीको सेयर मूल्यमा पोजेटिभ सर्किट लागेको छ । गोर्खा फाइनान्सको सेयर मूल्य ठ्याक्कै १० प्रतिशतले बढेको छ ।
त्यसैगरी, धौलागिरी लघुवित्त, खप्तड लघुवित्त, श्रृजनशील लघुवित्त, रिलायन्स फाइनान्स, हिमालयन पावर, घलेम्दी हाइड्रो, शिवश्री हाइड्रो, बुद्धभूमि नेपाल, युनियन हाइड्रोपावर लगायत कम्प्नीको सेयर मूल्य कपनि करिब १० प्रतिशतले बढेको छ ।
