काठमाडौं । राष्ट्रिय गौरवको आयोजनका सुनकोशी–मरिण डाइभर्सन बहुउद्देश्यीय आयोजनाको सुरुङ निर्माण तीव्र गतिमा अघि बढेको छ ।
गत असोज २८ गतेदेखि टनेल बोरिङ मेसिन (टीबीएम)ले खन्न थालिएको सुरुङमार्ग निर्माणले गति लिएको हो । आयोजनाका अनुसार डेढ महिना (मंसिर १७ गतेसम्म)अवधिमा १ किलोमिटर सुरुङ खनिसकिएको छ ।
आयोजना प्रमुख मित्र बरालले हालसम्म १ किमी सुरुङ खनिसकिएको जानकारी दिए । हालसम्म लक्ष्य अनुसार नै सुरुङ खन्ने काम अघि बढेको उनले बताए ।
उनले एक महिनामा ५०० मिटर सुरुङ खन्ने लक्ष्य रहेकोमा अहिले सोभन्दा बढी सुरुङ खनिएको बताए । दैनिक औसतमा १५ देखि २० मिटर सुरुङ खन्ने गरिएको उनले जानकारी दिए ।
१३.३ किमी लामो सुरुङ कमलामाई नगरपालिका–२ कुसुमटारबाट खन्न सुरु गरिएको हो । सुरूङ निर्माणको ठेक्का चिनियाँ कम्पनी चाइना ओभरसिज इन्जिनियरिङ (कोभेक)ले पाएको छ । उक्त कम्पनीले अबको २ वर्ष भित्र सुरु खनिसक्नुपर्नेछ ।
विसं २०७७ फागुन २० गते सुनकोशी मरिण डाइभर्सन बहुउद्देशीय आयोजनाको शिलान्यास भएको थियो । सुनकोशी गाउँपालिका ७ कानढुङग्रीस्थित सिन्धुली र रामेछाप जिल्लाको सिमाना भएर बग्ने सुनकोशी नदीमा डाइभर्सनको संरचना निर्माण गरी सुनकोशी नदीका करिब ६७ क्युमेक पानीलाई १३.३ किलोमिटर लम्बाइको सुरुङमार्फत कमलामाई नगरपालिका– २ कुसुमटारस्थित मरिण खोलामा पानी खसाल्ने योजना रहेको छ ।
सुनकोशीको पानी मरिणमा खसाली हालको बागमती सिँचाइ आयोजनाको संरचनामार्फत तराईका धनुषा, महोत्तरी, सर्लाही, रौतहट र बारा जिल्लको करिब १ लाख २२ हजार हेक्टर जमिनमा आयोजना मार्फत सिंचाइको सहज पहुँच पुर्याउन सकिने छ । साथै ३१.०७ मेगावाट क्षमताको जलविद्युत उत्पादन हुने छ ।
बागमती प्रदेशको जलस्रोतलाई मधेश प्रदेश पुर्याएर कृषि उत्पादन बढाउन आयोजना फलदायी हुने दाबी छ । यस वर्ष सरकारले राष्ट्रिय गौरवको यो आयोजनाका लागि २ अर्ब ७० करोड बजेट विनियोजन गरेको छ ।
