काठमाडौं । पूर्व–पश्चिम राजमार्ग अन्तर्गत कमला–ढल्केबर–पथलैया सडक ४ लेन सडकको डिजाइन अन्तिम चरणमा पुगेको छ । विश्व बैंक र नेपाल सरकारको संयुक्त लगानीमा विस्तार गर्न लागिएको १३० किलोमिटर यस सडकको डिजाइनमा अन्तिम चरणमा पुगेको हो ।
चार लेनमा विस्तारका लागि यो वर्ष प्रक्रियाअघि बढाउने गरी काम भइरहेको यस सडक खण्डको डिजाइन अन्तिम चरणमा रहेको हो । कमला–ढल्केबर–पथलैया सडक विस्तार आयोजना प्रमुख राजेन्द्रप्रसाद दासले आयोजनाको फाइनल डिजाइन आगामी डिसेम्बरसम्ममा सकिने बताए ।
‘प्रारम्भिक डिजाइन सकिन लागेको छ । फाइनल डिजाइन डिसेम्बरसम्म सकिन्छ अनि निर्माणको थप प्रकृया अघि बढ्ने छ,’ दासले चाणक्य पोष्टसँग भने ।
विश्व बैंक र नेपाल सरकारको संयुक्त लगानीमा ‘स्ट्राटेजिक रोड कनेक्टिभिटी एण्ड ट्रेड इम्प्रुभमेन्ट प्रोजेक्ट’अन्तर्गत सडक विस्तार अघि बढाउन लागिएको हो । राजमार्गको यो खण्डमा नेपाल सरकारको ३० प्रतिशत र विश्व बैंकको ७० प्रतिशत लगानी रहने छ ।
एसियाली राजमार्गको मापदण्डअनुरूप सहरी क्षेत्रमा ६ लेन विस्तार हुने छ । सो सडक चार लेनमा विस्तार गर्न लागिएको भए पनि सहरी क्षेत्रमा दायाँ–बायाँ दुवैतर्फ ‘सर्भिस लेन’ थप एक/एक लेनमा निर्माण गरिने र विभिन्न स्थानमा सवारी साधनका लागि ‘अण्डर पास’ तथा ‘ओभर पास’ निर्माण तथा जनावरका लागि सडक पार गर्न संरचना बनाइने सडक विभागले जनाएको छ ।
वातावरणीय अध्ययन तथा सर्वेक्षणको काम सम्पन्न भएर सडक तथा पुलहरू डिजाइन भइरहेको छ । जम्मा १३० किमी लम्बाइको सडकमा झण्डै ७६ पुल निर्माण हुने छन् । बागमती, बकैया र कमला खोलामा गरी ३ स्थानमा ‘सिग्नेचर पुल’ निर्माण गरिने छ ।
प्रतिघण्टा १०० किलोमिटरको दरले सवारी साधन गुड्ने गरी सडक निर्माण हुँदै छ । वस्ती तथा बजार क्षेत्रमा ७५ किलोमिटर प्रतिघण्टा गुड्नसक्ने छ । सडक विस्तारका लागि जग्गा अधिग्रहण गर्नुपर्ने अवस्था नभएकाले निर्माण कार्य छिटो सुरू गर्न सकिने भएको विभागले जनाएको छ ।उक्त सडक सन् २०२७ सम्ममा निर्माण गरिने अनुमान गरिएको थियो । यस सडक विस्तारको लागत ६४ अर्ब रुपैयाँ अनुमान गरिएको छ ।
सरकारले पूर्वपश्चिम राजमार्गको सबै खण्ड चार लेनमा विस्तार गर्ने गरी प्रक्रिया अघि बढाएको छ । कतिपय खण्डमा निर्माण अघि बढिसकेको छ भने कतिपय प्रक्रियामा छ । विस्तार भइरहेका सबै खण्डको सहरी क्षेत्रमा ‘सर्भिस लेन’ निर्माण गर्ने गरी डिजाइन भएको छ । आरक्षण क्षेत्र आसपासका क्षेत्रमा जनावरमैत्री सडक निर्माण गरिने भएको छ ।
