काठमाडौं । निर्माण प्रक्रिया अघि बढाइएको दुई दशक बिते पनि धोबीखोला करिडोर निर्माण अझै सम्पन्न हुन सकेको छैन । अन्तर सरकारी नियकाय समन्यवको अभाव, ठेकेदारको लापारबाही, मुआब्जा विवाद, स्थानीयको अवरोध लगायत कारणले २२ वर्षमा पनि करिडोर निर्माण सम्पन्न हुन नसकेको हो ।
आर्थिक वर्ष २०५६/५७ मा काठमाडौं महानगरपालिकाले करिडोर निर्माण प्रक्रिया अगाडि बढाएको थियो । महानगरपालिकाले काम गर्न नसकेपछि सरकारले आव २०६६/६७ मा करिडोर निर्माणको जिम्मा तत्कालीन नगर विकास समिति (हालको काठमाडौं उपत्यका विकास प्राधिकरण)लाई दिएको थियो ।
प्राधिकरणले धोबीखोला करिडोर सुधार आयोजना गठन गरी आयोजनाले पञ्चवर्षीय योजना बनाएर आव २०७२÷०७३ मा सक्ने लक्ष्य राखे पनि करिडोरको लम्बाइ थपिएको भन्दै आव २०७५/७६ सम्म सक्ने लक्ष्य बनाएको थियो । तर, विभिन्न कारण देखाउँदै काम सम्पन्न हुन नसके पछि हाल २०८० असार मसान्तसम्मका लागि म्याद थप गरिएको छ ।
धोबीखोला करिडोरको ठेक्का समान्तर/कमलजित/उमा जेभीलाई हस्तान्तरण गरिएको छ । सो ठेक्का कम्पनीले २०७६ जेठ ८ गते ठेक्का हस्तान्तरण गरिएको हो । ठेक्का कम्पनीले २०७८ जेठ १५ सम्म धोबीखोला करिडोर सुधारका काम पूरा गर्न भए पनि २०८० असार मसान्तसम्मका लागि म्याद थप गरिएको हो ।
२४ किलोमिटर (दुईतर्फ गरी)लामो धोबीखोला करिडोर बनाउन थालेको २० वर्ष भयो । बल्ल २१ किलोमिटर सडक कालोपत्र भएको छ । सो मध्ये अब ३ किलोमिटर सडक कालोपत्र हुन कति वर्ष लाग्ने हो, पत्तो छैन । ४ अर्ब ५८ करोड लागत रहेको यो आयोजनामा हालसम्म ३ अर्ब २० करोड भुक्तानी भइसकेको छ ।
बुढानीलकण्ठ क्षेत्रमा चार किलोमिटर मात्र ढल व्यवस्थापन गरेर बाँकी क्षेत्रको जिम्मा अधिकारसम्पन्न वाग्मती सभ्यता एकीकृत विकास समितिलाई दिएको छ । पहिरोका कारण चुनिखेल क्षेत्रमा सडक निर्माण हुन सकेको छैन भने निलोपुलको पूर्वपट्टी पाँच घरजग्गा अधिग्रहण गर्न बाँकी छ । त्यति मात्र होइन, पुलमुनिबाट बनाइएका अन्डरपासको उचाइ पर्याप्त छैन भने केही ठाउँमा अन्डरपासको निकास खुलिसकेको छैन । प्राधिकरणले भने चालू आवमा काम सकिने दाबी गरेको छ ।
उपत्यका विकास प्राधिकरण अन्तर्गत जिल्ला आयुक्त कार्यालयका इन्जिनीयर सजन कुँवरले धोबीखोला करिडोर निर्माण सम्पन्न गर्ने लक्ष्य अनुसार काम भइरहेको छ । उनले यो आर्थिक वर्षमा करिडोरको काम सकेर निर्माण व्यवसायीले हस्तान्तरण गर्ने योजना रहेको बताए । उनले केही अन्डर पास बाहेक सबै स्थानमा निर्माण सम्पन्न भइसकेको बताए ।
‘अन्डर पासमा १/२ ठाउँमा विकास नभएको हो, त्यो ठेक्का लागि सकेको छ, अब यो आव भित्रै पूरा गरेर हस्तान्तरण गर्न निर्माण कम्पनीलाई दबाब दिइरहेका छाैं,’ कुँवरले भने ।
धोबीखोला कोरिडोर निर्माण २ दशक बढी समयमा समेत सम्पन्न हुन सकिरहेको छैन । धोबीखोला कोरिडोर निर्माण प्रक्रिया सुरू भएको २२ वर्ष भइसकेको छ । काठमाडौं महानगरपालिकाले सवारीको चाप घटाउन वैकल्पिक मार्गका रूपमा धोबीखोला करिडोरको विकास गरिएको हो ।
