काठमाडौं । सेयर बजारमा लगातार दोहोरो अंकको गिरावट आएको छ । गत बिहीबारदेखि दोहोरो अंकले घट्ने थालेको नेप्सेले आज पनि सोही लय कायम राखेको हो ।
३ कारोबार दिनमै नेप्से १०६ अंकले घटेको छ । आइतबार नेप्से परिसूचक ३३.९७ अंकले घटेर १८७६.४१ बिन्दुमा आइपुगेको छ । यसदिन २२९ कम्पनीको १ अर्ब ६० करोड बढीको ६२ लाख ९६ हजार ४४५ कित्ता सेयर किनबेच भएको छ ।
आज कारोबारमा आएका १३ वटै उपसमूहको परिसूचक राताम्मे भएको छ । व्यापार समूह सबैभन्दा धेरै ३.२४ प्रतिशतले घटेको छ । त्यस्तै, हाइड्रोपावर समूह पनि ३ प्रतिशतले घटेको छ ।
आज बलेफी हाइड्रोपावरका सेयरधनीले सबैभन्दा धेरै ७.८५ प्रतिशत गुमाएका छन् । त्यसैगरी, राप्ती हाइड्रो ७.३०, दोर्दी खोला ७.२३, माउन्टेन, युनाइटेड मोदी, दिव्यश्वरी, लिबर्टी इनर्जी र एनआरएन इन्फ्रास्ट्रक्चरको सेयर मूल्य ६ प्रतिशतभन्दा धेरैले घटेको छ ।
