काठमाडौं । नेपाल फाइनान्स लिमिटेडका हकप्रद सेयर भर्ने आज अन्तिम दिन रहेको छ । कम्पनीले जेठ ६ गतेदेखि विक्रीमा ल्याएको हाल कायम चुक्ता पूँजीको ७० प्रतिशत अर्थात् १०ः७ अनुपातमा हकप्रद सेयरमा आवेदन दिने अन्तिम दिन हो ।
कम्पनीले प्रतिकित्ता १०० रुपैयाँ दरले ३४ करोड ५४ लाख ४७ हजार ४२७ रुपैयाँ ५० पैसा बराबरको ३४ लाख ५४ हजार ४७४.२७५ कित्ता हकप्रद सेयर निष्काशन गरेको हो ।
लगानीकर्ताले विक्री प्रबन्धक प्रभु क्यापिटल, नेपाल फाइनान्सका केन्द्रीय तथा शाखा कार्यालयहरु, नेपाल धितोपत्र बोर्डबाट सी आस्वा अनुमति प्राप्त बैंक तथा वित्तीय संस्थाका साथै मेरोसेयर मार्फत आवेदन दिन सक्नेछन् ।
हकप्रद निष्काशनका लागि कम्पनीले वैशाख २१ गते बुकक्लोज गरेको थियो। सो अनुसार वैशाख २० गतेसम्म नेप्सेमा कारोबार भइ कायम रहेका सेयरधनीहरुले मात्र उक्त हकप्रद भर्न पाउने छन् ।
कम्पनीको हकप्रदलाई क्रेडिट रेटिङ एजेन्सी इक्रा नेपालले ‘इक्राएनपी आइआर सी प्लस’ रेटिङ प्रदान गरेको छ। यसले वित्तीय दायित्व पूरा गर्न उच्च जोखिममा रहेको जनाउँदछ ।
हाल ४९ करोड ३४ लाख ९६ हजार ३२५ रुपैयाँ चुक्त पूँजी रहेको फाइनान्सको हकप्रद निष्काशनपछि ८३ करोड ८९ लाख ४३ हजार ७५२ रुपैयाँ ५० पैसा पुग्नेछ ।
