काठमाडौं । नेपाल विद्युत् प्राधिकरणले भारतमा बिजुली निर्यात गर्न सुरु गरेको छ । वर्षायाम सुरु हुन लागेसँगै उत्पादन बढ्न थालेपछि प्राधिकरणले बुधबारदेखि भारतमा बिजुली बेच्न थालेको हो ।
आन्तरिक उत्पादन बढ्न थालेसँगै प्राधिकरणले इण्डियन इनर्जी एक्सचेन्जमा ३९ मेगावाट बिजुली विक्री गर्न थालेको हो । बुधबार राती १२ बजेबाट भारतीय बजारमा विद्युत् पठाउन थालिएको प्राधिकरणले जनाएको छ ।
प्राधिकरणका अनुसार अहिले नुवाकोटमा संचालित त्रिशुली जलविद्युत्बाट उत्पादित २८ मेगावाट र देवीघाटबाट उत्पादित १५ मेगावाट बिजुली विक्री सुरु गरिएको हो ।
उक्त बिजुली ढल्केबर-मुजफ्फरपुर ४०० केभी अन्तरदेशीय प्रसारणलाइन मार्फत भारत पठाइएको हो । नेपालले कुल ३६४ मेगावाट बिजुली भारत निर्यात गर्न अनुमति पाएको छ । सोमध्ये अहिले ३९ मेगावाट निर्यात सुरु गरिएको छ भने आगामी दिनमा क्रमशः निर्यात बढाउँदै लैजाने प्राधिकरणले जनाएको छ ।
प्राधिकरणले हरेक दिन बिहान १० बजेदेखि १२ बजेसम्म भारतीय ऊर्जा बजारमा विक्री गरिने बिजुली मेगावाटसहित बिडमा प्रतिस्पर्धा गर्नेछ । विद्युत् प्रणालीमार्फत तय हुने ‘मार्केट क्लियरिङ प्राइस’का आधारमा विद्युत्को प्रतियुनिट विक्री दर तय हुनेछ।
यी ६ हाइड्रोपावरले बिजुली बेच्ने पाउनेछन्
भारतले नेपाललाई कुल ३६४ मेगावाट बिजुली निर्यातका लागि अनुमति दिएको छ । भारतले गत कात्तिकमा ३९ मेगावाट र चैतमा ३२५ मेगावाट गरी कुल ३६४ मेगावाट बिजुली बेच्न अनुमति पाएको हो ।
ऊर्जा जलस्रोत तथा सिंचाइ मन्त्रालयका अनुसार नेपालका ६ वटा जलविद्युत् आयोजनाले भारतको दैनिक विद्युत् बजार ९डे अहेड मार्केट०मा बिजुली बेच्न पाउने छन् ।
नेपालबाट प्राधिकरणको स्वामित्वको १४४ मेगावाटको ‘कालीगण्डकी ए’बाट १४० मेगावाट, ७० मेगावाटको मध्यमस्र्याङ्दीबाट ६८ मेगावाट, ६९ मेगावाटको मस्र्याङ्दीबाट ६७ मेगावाट र निजी क्षेत्रको ग्रीन भेन्चर्सको ५२.४ मेगावाटको लिखु-४ बाट ५१ मेगावाट गरी कुन ३२६ मेगावाट विद्युत् निर्यातका लागि स्वीकृति पाएका छन् ।
त्यस्तै, प्राधिकरणको स्वामित्वमा नुवाकोटमा सञ्चालमा रहेका २४ मेगावाटको त्रिशूली र १५ मेगावाटको देवीघाट विद्युत्गृहबाट उत्पादित ३९ मेगावाट विद्युत् विक्री गर्न अनुमति पाएको छ ।
हाल नेपालको विद्युत् उत्पादन क्षमता २२०० मेगावाट रहेको छ । सोमध्ये वर्षायाममा बढी हुने करिब ६०० मेगावाट बिजुली बेच्न सकिने प्राधिकरणले जनाएको छ ।
