काठमाडौं । सरकारले एउटै व्यक्तिले एकभन्दा बढी घर वा अपार्टमेन्ट किन्दा तिर्नुपर्ने रजिष्ट्रेशन दस्तुर दोब्बर बनाएको छ । सरकारले आगामी आर्थिक वर्ष २०७९/८० का लागि ल्याएको बजेटमार्फत रजिष्ट्रेशन दस्तुर शतप्रतिशत बढाएको हो ।
‘एउटै व्यक्तिले एकभन्दा बढी घर वा अपार्टमेन्ट खरिद गरेमा प्रत्येक थप घरको रजिष्ट्रेशन पास गर्दा शतप्रतिशत थप रजिष्ट्रेशन दस्तुर लाग्ने गरी आवश्यक व्यवस्था गरिनेछ,’ बजेटमा उल्लेख छ ।
अहिले घर/अपार्टमेन्ट किन्दा पुरुषको हकमा ५ प्रतिशत र महिलाको हकमा ३.५ प्रतिशत रजिष्ट्रेशन दस्तुर तिर्नुपर्ने व्यवस्था । अब पहिला एउटा घर भएको व्यक्तिले दोस्रो घर किनेमा रजिष्ट्रेशन दस्तुर दोब्बर तिर्नुपर्ने छ ।
यसैगरी सरकारले घरजग्गा कारोबारमा लाग्ने पूँजीगत लाभकर पनि २.५ प्रतिशत बढाएको छ । अब ५ वर्षभन्दा कम समय स्वामित्वमा रहेको घरजग्गा बेच्दा नाफाको ७।५ प्रतिशत पूँजीगत लाभ कर तिर्नु पर्ने छ । यसअघि यस्तो कर ५ प्रतिशत थियो ।
यस्तै, ५ वर्षभन्दा बढी समय स्वामित्वमा रहेको घरजग्गा बेच्दा भने ५ प्रतिशत पूँजीगत कर तिर्नु पर्ने छ । यसअघि यस्तो कर २.५ प्रतिशत मात्र थियो ।
१० लाख रुपैयाँभन्दा बढी मूल्यको घरजग्गा किनबेच गर्दा पूँजीगत लाभकर लाग्छ । कुनै पनि घर जग्गाको विक्री मूल्य र नाफा स्वघोषणा गर्न पाइने व्यवस्था छ । तर त्यसरी गरेको घोषणा गरेको मूल्य सरकारले तोकेको मूल्याकंन रकमभन्दा कम हुनु हुँदैन ।
