काठमाडौं । सेयर बजारमा उच्च अंकको गिरावट आएको छ । पछिल्लो केही महिना यता घट्दो क्रममा रहेको नेप्सेमा आज बजार खुल्ने बित्तिकै उच्च अंकको पहिरो गएको हो ।
मंगलबार बजार खुलेको ५० मिनेट (११ः५० बजेसम्म) नेप्से ४१ अंकले घटिसकेको छ भने घट्ने क्रम अझै जारी छ । पछिल्ला दिनहरुमा दैनिक दोहोरो अंकले घट्दै आएको नेप्से आज पहिलो घण्टामै ठूलो गिरावट आएको हो ।
पछिल्लो समय बैंकिङ प्रणालीमा भएको चरम तरलता अभाव र ब्याजदर वृद्धिले सेयर बजार प्रभावित हुँदै आएको छ । अर्थतन्त्रका अधिकांश सूचक झन्झन् खस्कँदो अवस्थामा रहेका छन् । यसले लगानीकर्ताको मनोविज्ञानमा नकारात्मक असर पर्दा सेयर बजारमा निरन्तर गिरावट आएको हो ।
यसैबीच, सोमबार नेपाल राष्ट्र बैंकले वाणिज्य बैंकका सीईओहरुलाई गाडी लगायत विलासी वस्तुको आयात रोक्न मौखिक निर्देशन दियो । जसले लगानीकर्ताले देशको अर्थतन्त्र झनै खराब हुँदै गएको बुझ्दा आज नेप्सेमा ठूला गिरावट आएको स्वयम् लगानीकर्ताहरु नै बताउँछन् ।
लगानीकर्तामा अर्थतन्त्र बिग्रिँदै जाँदा सेयर बजार पनि घट्छ भन्ने मनोविज्ञानले काम गरेको आकलन गरिएको छ । त्यस्तै, चैत मसान्तभित्र बैंकको ब्याज तिर्नुपर्ने भएकाले लगानीकर्ताले घाटै खाएर भए पनि सेयर बेच्न थालेको र त्यसको असर सूचकमा देखिएको ब्रोकरहरु बताउँछन् ।
यस्तै, ठूला कम्पनी तथा व्यवसायीहरुले पनि अग्रीम करकट्टीबापत ठूलो रकम बुझाउनु पर्ने भएकाले रकम जोहो गर्न सेयर बेच्दा बजारमा दबाब परेको बताइएको छ ।
